Rhơn m’ak, ntô̆ n’hao-nê lah ăp nau mpơl saơ bah ƀon lan tât nau rgâl mhe bah ntŭk ntu-“trong mpơl” bah nah dak bah ăp năm êp aơ. Mra dơi lah: ê tă mâp geh ntŭk ntu trong hăn bah Việt Nam geh ntuh kơl ma nau kan têh, nau ngăch ndrel nsôih prêh kơt rơh rlau aơ. Ntrong hăn ngăch Bắc-Nam mpeh ba dâng tă bah nhgoat njêng “nting kuih” bah jâng văng sa. Ntrong ndrâm dak lêng jru tâm Hải Phòng, Nkuăl ƀon têh Hồ Chí Minh, geh n’hao nkra, pơk hvi, n’hao nau dăng nchuăn rdeng ndơ ndrel tăch luh ndoh ndơ. Ăp mpông trong trôk tơm geh nkra nâp, tâm nê geh mpông trong tach ndeh mpar Long Thành, ntŭk kan tơm bah neh dak, dôl geh ƀư ndal, ŭch mra jêng nau nsôih hun hao mhe bah nkualư văng sa mpeh ba dâng.

            Ndrel ma trong hăn, ri ŭnh nar kŏ geh hun hao. Âk nau kan điện sial, điện măt nar geh leo lăp dŏng. Trong điện geh ntuh kơl n’hao nkra tĭng trong ueh, mhe, nâp lơn, tĭng dơi nau ŭch hun hao văng sa mrô, văng sa ndrih. Ndrel ma nê, nau ndâk njêng đô thị ueh, trong kan mrô, trong viễn thông geh pơk hvi geh ntrŭt dăng, njêng nau nâp ân Chính phủ mrô, văng sa mrô, nau rêh mrô.

            5 năm rlau aơ, ntuh kơl nsum geh nsŭn n’hâm, tâm nê 80% rgum tâm trong hăn ma ngăn lah năm 2025 aơ, ntuh kơl nsum geh tât 7% GDP. Tâm rnôk ăp nau dơi hôm đê̆, rnoh mrô tă bah tơm prăk ntuh kơl nsum ân trong hăn hŏ ƀư rjăp nau kơl an, gay ƀư dơi nkô̆ nau rgâl mhe ntŭk ntu, ngoai tâm 3 nau rgâl mhe nau kan geh mbơh ta nau ntrŭnh bah Đảng.

            Nau ngăn lah tâm năm kan Đại hội XIII lah nau rgâl mhe geh tât nau dơi mpeh nau mĭn ntuh kơl. Ntơm bah nau knŭng nsing tâm tơm prăk Ngih dak, Việt Nam jêng janh pơk hvi mpông ân nkuăl kan êng ndrel nkuăl ntuh kơl tă bah dih. Lah rmôt kan râng âk nau kan ntŭk ntu trong tơm tĭng nau dơi kan nsum, êng, wa Phan Hữ Duy Quốc, N’gâng kan công ty ndâk mrô 1, mbơh nau:

            “Nau kan ndâk nkra, đah ăp nau kan jêr, ăp ntŭk kan jêr, ă ntŭk geh ƀư prêh ngăn bah Việt Nam mô lah ăp ntung geh rlet dak lêng têh, ntŭk kan tăch rgâl tâm dak ƀư ân lôch n’hâm nơm. Nau hun hao ueh ngăn ndrel mra vơt dơn ăp nau kan têh lơn”.

Nau ngăn tă bah nau kan tơm bah neh dak tâm rơh rlau aơ hŏ mpơlsaơ ân nau kan ngăn ân nau mpŏng kan bah Đảng mpeh hun hao ntŭk ntu tâm ban, ueh mhe, geh tât nau tâm rgop âk nkuăl. Tiến sĩ Nguyễn Phương Bắc-Kruanh Viện Mĭn njêng nau hun hao văng sa, rêh jêng n’gor Bắc Ninh, mbơh nau:

‘Ntuh kơl rnôk aơ rgum âk ngăn rnoh ƀư mpeh bôk nau kan, ngăn lah rgum tâm ăp nau kan geh tât nkuăl, pơk hvi ntŭk kan gay hun hao. Bắc Ninh-Bắc Giang jêh rnôk tâm rnglăp 2 n’gor nsum ri nsing tâm nau kan geh dơi lah nau tâm nthoi đah ăp nkuăl mpeh gôl yôk mpeh ba lơ ndrel ăp nkuăl mpeh đồng bằng sông Hồng”.

Nhoat lăp tâm rơh mhe, bôk nau nchrăp mbơh nau kan Chính trị mbơh Đại hội XIV lŏ lah rjăp: nau rgâl mhe ntŭk ntu lŏ geh lah ngoai tâm ăp nau nsôih tơm bah hun hao neh dak. Nau mĭn rgum geh n’hao jêng nau kan têh, sŏk hun hao ntŭk ntu ƀư kan bah nkuăl jêng nau tơm, n’hao nau tâm ntoi bah ăp nkuăl, ăp ntŭk kan. Nkô nau mô êng lah ndâk tay âk ntŭk kan, ma hôm lah nau njêng trong kan ntŭk ntu ueh mhe, blau mhe, ndrih ndrel nâp nâl, bah nê n’hao nau dăng n’hâm ntul rlong bah neh dak, n’hao nau dăng dơi bah Việt Nam tâm trong kan bah nkuăl ndrel lam ntur neh.

Nŭih ƀư nau kan văng sa, giáo sư, tiến sỹ Hoàng Văn Cường-Uỷ viên Uỷ ban tơm prăk-Ngân sách bah Quốc hội kơp dơn, nau mĭm mhe tâm nau rgum ntuh kơl ntŭk ntu hŏ geh ntoh nkre tam ăp nau kan tơm dơi geh ndâk tâm di tâm năm aơ.

‘Bah năp nơh nơm knŭng rgum âk ngăn tâm nau kan mpeh ntŭk ntu gung trong hăn, yơn lah tât rnôk aơ nơm uănh ri saơ ăp nau geh dơi ngăn bah păng lah dơi ƀư nau kan ding lĕ ăp ntrong kan. Ndri ma, phung he ân geh pơk hvi nau kan tâm boh nsum êng tâm ăp nau kan kơt lah ntŭk ntu mpeh dak si, ntĭm nti, ăp nau kan văn hoá, thể thao gay pơk trong nơih ân geh hun hao”.

Uănh tay năm kan Đại hội 13, mra saơ lah ntrong kan rgâl mhe ntŭk ntu hŏ njêng ƀư nau dăng nâp nâl ân rach năm hun hao mhe. Ăp trong hăn ngăch geh nthoi jong, ăp tach ndeh mpăr, ăp ndrâm dak lêng geh pơk hvi, ăp đô thị ueh mhe dơi geh njêng...hŏ ndrel dôl ƀư ân dơi nau mpŏng tât du neh dak geh anu rnơm lăp tâm ntrong kan hun hao mhe, nâp nâl, dăng rjăp tâm ăp rach năm ba kơi aơ./.