Ôi 13/11, Quốc hội lĕ nsơr ty mbơh an Nghị quyết mpeh trong nchrăp hun hao wăng sa-rêh jêng năm 2026. Quốc hội nsrôih ngăch hao dĭng lĕ ndơ tâm dak (GDP) nsrôih bah 10% let lơ, gay geh jâng nsan nâp nâl an hao jêng nâp nâl ta rnoh 2 mrô tâm lvang tât. Nghị quyết nkoch kloh: Năm 2026 geh nkô̆ nău khlay, ƀư Đại hội rơh tal 14 bah Đảng, ƀư săch đại biểu Quốc hội khóa 15 n’hanh đại biểu Hội đồng nhân dân ăp gưl năm kan 2026-2031, lah năm bôk năp ƀư Trong nchrăp hun hao wăng sa-rêh jêng 5 năm 2026-2030, lăp tâm rach năm hao êng nơm hun hao sâm ndrŏng, uĕh lăng bah rnoi nuĭh.

Kơl lor ntrôl hao jêng tĭng nkô̆ nău nâp nâl đăp mpăn wăng sa têh, uănh nđôi ntoh hao mhe, đăp mpăn ăp tâm pă têh. Nghị quyết mĭn lah 15 rnoh an ƀư khlay, tâm nĕ: ngăch hao jêng wăng sa nsrôih ntuh kơl bah 10% let lơ. Nău geh rĭng bôk nuĭh geh 5.400 đôlar. Rnoh rnăk ach o (tĭng di ach o âk trong) hŭch rlău 1%... Mpeh trong mkra, Quốc hội đă, kơl lor tay ntrôl hao jêng hăn ndrel đah nâp nâl đăp mpăn wăng sa têh, uănh nđôi ntoh hao mhe n’hanh đăp mpăn tâm pă têh bah jâng wăng sa. Tâm rgop rjăp, săk nglăy, ngăch tâm pleh đah nău kơl prăk kaih n’hanh nău kơl têh êng, jêh tay trong ƀư, pháp luật geh tât ntuh kơl nsum, mkra ăp ntŭk kol, n’hŭch gay ntrôl ngăch sŏk an prăk ntuh kơl nsum bah bôk năm 2026, lơn lah ăp nău nchrăp ƀư khlay, tơm khlay neh dak n’hanh ăp bôk nău kan rƀŏng tĭng lam dak.