Nar 7/4, mpôl công an hŏ ndu leo Nguyễn Văn Khởi, (27 năm deh) bah xã Thạch Phú, nkuâl Mỹ Xuyên, n’gor Sóc Trăng sĭt Dak Lak gay ôp uănh tay mpeh nău rlăm pit in drăp ndơ. Nguyễn Văn Khởi lah nuĭh dŏng mạng xã hội rlăm bơi 100 nuĭh gay pit in drăp ndơ rlău 500 rkeh prăk.

Tĭng ôp uănh bôk năp, kêng dŭt khay 10/2023, Jrô kan rnă njrăng mạng n’hanh Jrô  kan rdâng lơh nuĭh tih dŏng công nghệ mhe Công an n’gor Dak Lak dơn geh siƀŭt mbơh bah du hê nuĭh ƀon lan gŭ ta xã Ea Tu, nkual ƀon têh Buôn Ma Thuột, đah nkô̆ geh du hê nuĭh rlăm tăch bum kao si lay ơn ta mạng lôch nê pit in 10 rkeh prăk. Ma ăp trong way ƀư, công an năl nuĭh ƀư mplư rlăm lah Nguyễn Văn Khởi, dôl gŭ rêh ta n’gor Sóc Trăng. Pah kan đah công an, ntơm mbơh nău tih, tă geh nău tih “Mplư rlăm pit in drăp ndơ”, mô hŏ lĕ năm tih. Kêng dŭt năm 2022, nuĭh tih mhe luh ndrung n’hanh geh nău mĭn mplư rlăm tay sŏk prăk dŏng pâl. Gay tĭng ƀư nău rlăm, Khởi njêng tài khoản Facebook moh "Hoa Tươi Đà Lạt”, râng tâm  ăp âk nkô̆ rmôt tăch rvăt ăp ntil kao n’hanh play do ta Facebook.

Rnôk geh nuĭh ôp dăn rvăt, Khởi đă njuăl prăk nchăm manh lor lôch nê rdêl trong ôp, pit in prăk kaih. Ma trong mplư rlăm dja, ntơm bah kêng dŭt năm 2022 tât aƀaơ, Khởi hŏ rlăm bơi 100 nuĭh ta âk n’gor, nkual ƀon têh lam dak, pit in rnoh prăk rlău 500 rkeh prăk./.