Đang, pĭch rluh djơh, lah nău dôl geh ta lôch rbông me, jong bơi 10 km, ndơ̆ dak bah N’glău Ea Sup hạ sĭt xă Ea Bung, nkuăl Ea Súp. Âk gưl bê tông geh rluh jêng ăp ntu têh, kơh rbông geh dak rchoh. Nô Nguyễn Văn Phú, jay geh 8 sào ba lŏ ta pĭt trong rbông dak aơ ta dŭt thôn 5, xă Ea Bung an gĭt, đêt năm dăch aơ, dak sĭt mô rĭng jêng săk geh ba hŭch tât 30%, nuĭh srih tăm ba mô hôm geh sa.

Rbông pơng geh chah jêh nĕ lăp dak, jêng rnoh dak sĭt dŭt thôn 5 mô tŏng. Gay dơi tuch tăm ri kônh wa an koar ntu, dŏng dak ta ăp gưl dak diăng n’gân măy gay bơm tŏ an ba. Prăk dŏng dŭt âk yor phân poh, điện hao âk, âk kônh wa srih tăm ba geh roh dơm.

Xă Ea Bung, nkuăl Ea Súp geh rlău 1000ha ba dơi tŏ tu dak bah rbông me. Yơn jêh âk năm dŏng, mô knŭng 10 km rbông me, ma lĕ rngôch rbông kon hăn rlău xă, lĕ jŭr djơh hô, ƀư tuch tăm ba tâm lam xă khuch. Wa Lê Hồng Hạnh-Bí thư Đảng ủy Ea Bung an gĭt xă lĕ dăn đă UBND n’gor ntuh kơl nkra tay.

Trong rbông dak aơ ndơ̆ dak sĭt ndrĭch lŏ mbrơi, đê̆ đŏng âk ntŭk mô geh dak hoch sĭt, khuch dŭt têh tât săk geh srih tăm. Mpôl hên lĕ đă n’hanh mpŏng ŭch UBND n’gor ntuh kơl nkra trong rbông gay m’hâm ƀư ndơ̆ dak sĭt ngăch tât lĕ rngôch ăp rnoh neh tŏ an tơm tăm bah kônh wa tâm xă, gay m’hâm ƀư săk geh bôh ba dơi săk rnglăy lơn.

Ea Súp lah ntŭk têh ba bah n’gor Dak Lak, geh n’glău dak bât têh ngăn n’gor ndrel trong rbông jong bơi 105km, nchrăp tŏ an 8.210 ha tơm tăm; Pă dak dŏng an nklăp 20.000 ƀon lan. Yơn lah, tĭng wa Trịnh Quốc Bảo-Groi Giám đốc Công ty TNHH MTV Mât uănh ndơ dak bât n’gor Dak Lak, trong rbông aơ dôl geh jŭr djơh hô đah dŭt âk ntŭk pĭch rluh, chah đang. Ta ăp ntŭk êng, bê tông lĕ djơh n’hanh lăp dak. Ăp năm công ty dơi pă an rlău 1 rmen prăk ntop kơl nkra tay. Êng tâm năm 2023, dơi UBND n’gor Dak Lak ntop kơl tay rlău 10 rmen prăk bah tơm prăk nkrem njrăng n’gang trôk nar lơh bah n’gor, rhŏ an nkra ăp ntŭk djơh, chah đang têh... Yơn rnoh prăk aơ mô dơi mkra nău jŭr djơh âk bah ăp trong rbông. Wa Bảo an lah, gay nkra săk rnglăy, mbra ŭch tât rnoh prăk âk.

Gay nkra têh, mô lah nkra djơh lĕ rngôch ăp trong rbông ri ŭch geh prăk ntop kơl bah Ngih dak, gay nkra lĕ an geh rlău 100 rmen prăk mư tŏng. Tơm prăk dơi rlak bah tơm sŏk bah dak bât, ntop kơl njrăng n’gang trôk nar ri mô dơi tŏng.  

N’gor Dak Lak aƀaơ geh bơi 620 n’glău n’gâr dak bât đah rnoh dak rlău 650 rkeh m3 dak; 161 dak bât hao, 76 trạm bơm, n’hanh 2 trong nking lôch dak. Tâm nĕ, âk dak bât lĕ jŭr djơh hô, ƀư roh đăp mpăn n’glău bât, lơn lah trong kan pơk dŏng tŏ djeah. Âk n’glău bât, rbông dak dak ta Dak Lak geh djơh, jŭr djơh, khuch tât âk rmen prăk. Jêh hăn uănh aƀaơ geh 57 dak bât geh âk nău roh đăp mpăn. Yơn lah, nău nkra dôl mâp âk jêr yor mô hŏdơi pă prăk.

Ta nkuăl Ea Súp tât aƀaơ, ƀon lan lĕ ntơm rek jêh ba wai, nchrăp ƀư neh, srih tăm yan mih năm 2024. Đah trong rbông dak bât mô hŏ dơi nkra, ri hăng rbăn ha ba bah kônh wa ntŭk aơ rdâng tay đah yan ba hŭch săk geh rnôk mô đăp mpăn tu tơm dak tŏ.