Râng Nar rgum nău kan yor UBND nkual ƀon têh Buôn Ma Thuột tâm rgop đah Ntŭk rhŏ nău kan n’gor Dak Lak ƀư bôk khay 5 mhe rlău, Công ty TNHH Vũ Nguyên Bio n’gluh an săch geh đêt ngăn 30 nuĭh. Yơn săk rnglăy mô geh kơt nău ŭch. Yuh Nguyễn Ý Nga, Giám đốc công ty an gĭt, du khay Công ty ŭch săch nklăp 50 nuĭh đah ăp ntil nău kan kơt: nuĭh mpli cà phê, kỹ thuật viên spa, nail, mpeh rhŏ pâl nđaih, khách sạn gay pă an ntŭk kan, yơn bah bôk năm tât aƀaơ mhe săch geh 30 nuĭh.

Aƀaơ rnoh nuĭh pă an nuĭh kan bah công ty mô hŏ tŏng, yor Công ty geh 3 ntŭk lah Dak Lak, Dak Nông n’hanh Phú Yên. Mô geh dơi tŏng jêng mô hŏ dơi pă an ntŭk kan tal 3.

Lah Doanh nghệp dôl geh rnoh nuĭh âk ngăn ta Dak Lak, đah nklăp 1.500 nuĭh. Công ty Able Joy ta nkual công nghiệp Hòa Phú dôl mâp jêr jŏt tâm nău săch nuĭh kan. Wa Trần Chí Vĩ, Groi Tổng giám đốc Công ty Able Joi nkoch, aƀaơ công ty dôl nchrăp ndơ̆ an dŏng ntŭk tal 2. Ntŭk aơ ŭch săch dŏng nklăp 3.000 nuĭh. Bah bôk năm tât aƀaơ, Công ty lĕ tâm rgop âk trong, tâm rgop đah âk ntŭk gay săch nuĭh kan, yơn knŭng dơi geh nklăp 300 sam ƀŭt rhăch nău dăn. Sam ƀŭt nchăm ndơ hao, ngih nkra njêng mhe êp an dŏng, yơn nuĭh pah kan lŏ mô tŏng ƀư Công ty an joi ăp trong gay đăp mpăn sam ƀŭt nchră ndơ:

Sam ƀŭt nchăm ndơ năm 2024 hao 50%, jay nkra njêng nchrăp lah 1/6 jêh, dŭt âk aƀaơ nuĭh kan, lah geh ri he nchrăp nkra njêng, yơn aƀaơ dôl ŭch nuĭh kan. Lah mô dơi tŏng nuĭh kan ri an joi lĕ ăp ntŭk kan êng, công ty êng ntop kơl he ê nkra gay đăp mpăn sam ƀŭt nchăm ndơ.

Tĭng nău mbơh bah Ntŭk rhŏ nău kan n’gor Dak Lak, tâm 3 khay/2024, geh rlău 50 ntŭk kan, doanh  nghiệp râng tâm 13 rơh rgum joi nău kan yor Ntŭk kan ƀư đah nău ŭch săch rlău 7.000 nuĭh. Ntŭk kan lĕ mbơh ntĭm nău kan n’hanh mbơh nkoch nău kan an rlău 12.00 nuĭh, yơn knŭng 440 nuĭh hăn kan jêh nkoch mbơh. Tâm 3 khay năm 2023, Ntŭk kan lĕ dơn bơi 1.500 sam ƀŭt rhăch nău đă geh bảo hiểm roh nău kan. Nău ŭch săch nuĭh kan âk, rnoh nuĭh dơn bảo hiểm roh nău kan hao yơn mô geh nău tâm di đah nuĭh pah kan n’hanh ntŭk kan săch, lah rlơ̆ dôl geh ta Dak Lak. Rblang mpeh nău aơ, wa Nguyễn Văn Cường, Groi giám đốc Ntŭk rhŏ an nău kan n’gor Dak Lak an gĭt:

Dŭt âk nuĭh pah kan mpeh geh ntop kơl bảo hiểm roh nău kan nău ŭch khlay lah geh ntop kơl lor, jêh nĕ mư joi nău kan. Du đêt băl ŭch joi nău kan ƀư yơn lah rnoh prăk khay ta Dak Lak lŏ đêt lơn ăp n’gor mpeh bah dâng, jêng mô ŭch.

Wa Nguyễn Quang Thuân, Groi Giám đốc N’gâng kan thương binh n’hanh Xã hội n’gor Dak Lak mĭn lah, n’gor dôl geh nuĭh pah kan âk đah nklăp 1,2 rkeh nuĭh tâm rnoh năm pah kan. Âk năm bah năp, N’gâng kan lao động thương binh n’hanh Xã hội n’gor lĕ ntrôl dăng trong kan tâm rgop, ntĭm nti, mbơh ntĭm, nkoch mbơh nău kan đah nuĭh pah kan đah doanh nghiệp, đah doanh nghiệp n’hanh ăp ntŭk an boăt nthoi nău ŭch-dŏng. Yơn lah, săk rnglăy mô kơt nău ŭch. Wa Thuân an lah, bah jêr jŏt tâm nău joi nuĭh kan an đă doanh nghiệp n’hao nău geh an mât jâng nuĭh pah kan.

Pah kan kan jâng ty dŭt âk, đê̆ đŏng pah kan geh chứng chỉ nău kan dŭt âk. Nău ta aơ nuĭh pah kan dơi tât đah ăp doanh nghiệp đŏng lah mô ri tĭng tâm âk nkô̆ nău, tâm nĕ nkô̆ nău prăk khay, nkô̆ nău mpeh đăp mpăn rêh jêng, mpeh ntŭk ntô pah kan ri nĕ lah ăp nău ma ăp doanh nghiệp an geh nău rgâl mhe, nuĭh pah kan an tâm di gay 2 ding tâm mâp.