Ôi 5/7, Rnâng kan Ban Bí thư Lương Cường râng Tâm nchră sơ kết 6 khay bôk năm bah Ban Nội chính Trung ương.

Lah ta rnôk tâm nchră, Rnâng kan Ban bí thư Lương Cường nkoch kloh, hôm du năm tay đŏng lah dŭt jêh năm kan XIII bah Đảng, jêng, Ban Nội chính Trung ương ân nsrôih, lĕ n’hâm suan, geh nău tam lơn gay rgŏ tĭng ƀư geh nău dơi ăp nău dơn kan mpeh nội chính, njrăng, n’gang sa khâm, tih djơh n’hanh rgâl dơh uĕh tư pháp tĭng Nghị quyết Đại hội XIII bah Đảng. Ân ƀư jăp tay pah kan nsŏng kơl rlăch ndăng sa khâm, tih djơh, nkre đah nău an tĭng ƀư jăp Quy định 144 bah Bộ Chính trị mpeh di rnoh nuih n’hâm uĕh lŏng bah cán bộ, đảng viên tâm rơh mhe. Ndrel đah nê, nsŏng kơl tay nkra dŭt bah ăp nău tih sa khâm, tih djơh geh tât cán bộ, đảng viên, rhŏ dŏng pah kan nchrăp nuĭh kan Đại hội đảng ăp gưl.