Ôi ntri (17/12), ta Nhih pah kan Chính phủ, Thủ tướng Phạm Minh Chính ƀư tơm rơh hop tâl 4 bah Ban rđău đă Trung ương mpeh trong kơl jay gŭ n’hanh ntŭk tăch rgâl neh ntu.  Lah ta rơh hop, Thủ tướng Phạm Minh Chính lah rjăp lôch jêh jut jăng jay truh sat, nkưp nde, "Trong hăn kan ndăng", tâm du năm 4 khay hŏ rgum wat jêh jut jăng rlău 334 rbăn mblâm jay truh sat, nkưp nde lam dak, rgâl jêng ăp mblâm jay têh uĕh lơn.

Đah jay gŭ thuk prăk, Thủ tướng lah rjăp ăp nău dơi di ma rhơn rnôk nău ŭch ndơ̆ luh tâm năm 2025 lah wat jêh 100 rbăn mblâm jay thuk prăk, tât aƀaơ hŏ tât n’hanh rlău rnoh ndơ̆ luh. Đah rnoh ngăch dja, Thủ tướng nsing nơm dŭt mbrơi năm 2028 lôch jêh 1 rkeh mblâm jay thuk prăk. Thủ tướng dăn đă pơk ntŭk tăch rgâl neh ntu kloh rvah, đăp mpăn; âk ntil tơm prăk an neh ntu ma trong ngân hàng, trái phiếu, tâm boh bah dih tâm trôm ngih dak... Nuih n’hâm nsum rlai lăp tâm ban, nkre dơi mât đăp mpăn mpeh rnoh khlay, deh prăk kon yơn ân kân bah hao khlay ndơ; mât kân rnoh khlay neh; nkre jêng ntŭk rgum rhŏ dŏng neh ntu, nkra nkô̆ nău rmeh bưm neh ntu.