VOV4.M’nông- Nar 20/9, ta An Giang geh ƀư rơh rƀŭn nchră lam ntur neh rdâk njêng trong n’har bri Việt Nam- Campuchia đăp mpăn, tâm rnglăp, tâm kơl ndrel hun hao tal 6 năm 2022. Ntoh ngơi ta rơh rƀŭn nchră, wa  Lê Tiến Châu, groi kruanh- Tổng thư ký Ủy ban Trung ương MTTQ Việt Nam lah na nê̆, lôch rlău 5 năm ký nău mbơh tơih nsum nău geh rơh rƀŭn nchră lam ntur neh mpeh nău rdâk njêng trong n’har bri đăp mpăn, tâm rnglăp Việt Nam- Campuchia, ăp nkô̆ nău geh mbơh ƀư, ƀư tĭng ăp nar lơ ma têh hvi ta ăp gâl kan, geh săk rnglăy na nê̆, ngăn lah ta ăp n’gor geh nsum trong n’har bri, an tâm di đah nău ŭch rŏng nsum bâh ƀon lan bar dak.

Ta rơh rƀŭn nchră aơ, ăp đại biểu ndrel tâm mbơh nău kan, tâm nchră nău geh uănh năl mbơh tơih nău kan nău mbơh nsum ta rơh rƀŭn nchră tal 5, tâm rgop ta nkô̆ nău nchrăp “Nău mbơh tơih nsum nău geh mpeh rơh rƀŭn nchră lam ntur neh rdâk njêng trong n’har bri Việt Nam- Campuchia đăp mpăn, tâm rnglăp, tâm kơl ndrel hun hao tal 6, năm 2022” nkre lah, dăn mbơh ăp nău rgâl mhe nđâp mpeh nkô̆ nău, trong kan gay ma n’hao nău dơi pah kan ngăn, săk rnglăy tâm kơl đah 2 ding tâm let năp tay.

 Nuĭh rblang: Thị Đoắt