Thôn Hiệp Đồng, xã Hòa Xuân lah nkual bah dâng dak me Bàn Thạch. Tâm rơh dak bŭk năm e nơh, bar pe jât rnăk geh ndâp băm, lĕ ma ƀon ngâm tâm dak, âk rnăk kơt lah bơi roh dơm. Ăp năm bah năp nơh, rnôk ăp tơ̆ mih têh, dak bŭk way ler lăp tâm nkual ƀon lan gŭ. Yor kơt nê̆, rnôk n’gâng kan ta ntŭk geh trong nchrăp rdâk mon jay der dak bŭk nsum ƀon lan yơn mô hôm geh neh, rnăk wa Nguyễn Văn Liễm hŏ rong êng rlău 400 mét vuông neh, ta n’glah pe trong mbluh thôn, gay rdâk mon jay.

“Gâp geh du blah neh ta n’glah pe trong, nklăp 1.760 mét vuông. Gâp rong neh, rdâk lĕ dah âk ri rdâk, hôm dah âk ri hôm, mô dăn đă trok tâm mô lah geh ndơ nkol đah Ngih dak. Săk gâp nơm dŭt rhơn đŏng, he an ma he rhơn. Jêh aơ tay, mô dơn êng rnăk wâl nơm ma lĕ ma ƀon, hôm tât rơh kon, rơh său, rơh se mbra geh ntŭk ma gŭ der dak bŭk, der phŭt đŏng.”

Ta thôn 1, xã Xuân Lãnh, rnăk wa Nguyễn Văn Lang, wăr năm hôm krit jêr đah nău rêh yơn hŏ rong êng 300 mét vuông neh gay rdâk mon jay der dak bŭk nsum mpôl đŏng. Lơn âk neh rong an lah du drăp ndơ têh đah du rnăk hôm jêr jŏt. Yơn lôch dak bŭk năm 2025, uănh saơ kônh wa ân nchuăt dak bŭk, păng n’glêh an rong neh bah rnăk wâl an rdâk njêng ndơ dŏng nsum.

"Năm 2025 dak bŭk krit ngăn, jêng klach ngăn, tât năm 2026 oh nô tâm jay saơ yô̆ ngăn, aƀaơ he ndra ma rong neh gay ƀư ntŭk gŭ der phŭt an kônh wa tâm ƀon lan."  

Ntơm bah gâl rong neh bah rnăk wa Lang, du jay der phŭt dak bŭk nsum mpôl nâp uĕh hŏ dơi rdâk mon. jay geh bar dăp, chor prêh, nkre lah ntŭk gŭ nde rnôk tât trôk nar lơh, nkre lah ntŭk gŭ rgum bah nuĭh ƀon lan. wa Lê Văn Đông, Kruanh thôn 1, xã Xuân Lãnh, an gĭt, 97 rnăk ƀon lan gŭ rêh meng dak me ta thôn 1 aƀaơ hŏ geh tay ntŭk der đăp mpăn rnôk geh mih têh, dak me hao.

"Wa Nguyễn Văn Lang gŭ rêh ta ntŭk geh nău tâm rŏng đah ƀon lan, jêng hŏ rong neh gay kônh wa geh ntŭk ƀư jay rgum ƀon lan. Kônh wa dŭt rhơn nđơr đŏng yor hŏ geh ntŭk der phŭt dak bŭk ndal, aƀaơ ntoh ndal ta ntŭk he."

Tât aƀaơ, nklăp 100 mblâm jay der dak bŭk nsum mpôl hŏ dơi rdâk mon ta ăp ntŭk dơh geh dak bŭk bah n’gor Dak Lak, tâm nê geh bơi 2.000 mét vuông neh tă bah 5 rnăk rong êng. Đah ăp rnăk hôm jêr jŏt, nê mô dơn lah nău rgop mpeh drăp ndơ, ma hôm lah nău tâm rong, nău dơn kan đah nsum mpôl. Yor rnôk trôk nar tât, nău dŭt khlay lah nuih n’hâm mbra tâm pă, ndrel kônh wa rlău dơi nău tât rmoh rman.