Kêng măng lơ 20/6, Groi Chánh án Ngih phat dôih ƀon lan gưl prêh Phạm Quốc Hưng lĕ an nău ntrŭnh săch Chánh an Ngih phat dôih ƀon lan n’gor Kon Tum đah wa Hà Viết Toàn. Wa Hà Viết Toàn, 48 năm deh, Thẩm phán Trung cấp, dơi săch mât ƀư Chánh án Ngih phat dôih ƀon lan n’gor Kon Tum. Wa Toàn geh 23 năm pah kan tâm nău kan phat dôih. Bah năm 2018 tât aƀaơ, wa Toàn mât ƀư Groi Chánh án Ngih phat dôih ƀon lan n’gor Gia Lai.

Ta nar ƀư, mbah rhơn wa Hà Viết Toàn dơi đă tâm pleh, săch ƀư nău kan mhe, wa Phạm Quốc Hưng, Groi Chánh án Ngih phat dôih gưl prêh đă wa Toàn ndrel Ban cán sự Đảng, kruanh Ngih phat dôih Ƀon lan n’gor Kon Tum n’hao nuih n’hâm tâm rnglăp; ƀư uĕh nău way rgum ƀon lan ƀư tơm. Công chức n’hanh nuĭh pah kan Ngih phat dôih ƀon lan 2 gưl n’gor Kon Tum an kơl n’hanh tâm pleh ndrel Chánh án mhe gay ƀư uĕh ăp nău kan dơi jao.