VOV4.M’nông:   Du ntŭk kan mpeh tâm Tổng Công ty Giấy Việt Nam, Công ty TNHH du ntŭk kan ndơ ƀư n’ha rđaih miền Nam ntơm ƀư tăm bri ta n’gor Kon Tum bah năm 2001. Rlău 21 năm đah âk nău mâp, rlet rlău jêr jŏt, ntŭl rlong tât aƀaơ ntŭk kan geh dĭng lĕ bơi 8.200 ha bri, tâm nĕ rlău 7.400 ha dơi geh trok prăk mât ntŭk ntô bri. N’hêl na nê̆ an saơ tơm prăk dơi geh bah nău kơl trok nkhôm ntŭk ntô bri lĕ kơl Công ty TNHH Du ntŭk kan ndơ ƀư n’ha rđaih miền Nam ƀư uĕh lơn trong kan mât uănh njrăng n’gang n’hanh hun hao bri bah ntŭk kan.

          Kơp tât khay 9/2022 dĭng lĕ rnoh neh bri tăm bah công ty TNHH Du ntŭk kan si ƀư n’har rđaih miền Nam ta n’gor Kon Tum bơi 8.200 ha. Bri tăm bah ntŭk kan mô rgum ma hvi jong, tâm pă ta 33 xă, nkuăl têh tâm 8 nkuăl, dŭt âk lah nkual jru, ngai, nkual dŭt jêr jŏt bah n’gor Kon Tum. Nô Nguyễn Đình Hùng, nuĭh geh 12 năm hăn ndrel đah trong kan mât njrăng n’hanh hun hao bri bah Công ty TNHH Du ntŭk kan si ƀư n’ha rđaih miền Nam, an gĭt nău kan bri wăr năm ŏk r’ah yơn nô dŭt ŭch nău kan:

“Nău kan bah gâp ăp nar, ăp pơh ri hăn uănh nđôi mât njrăng nking n’gang ngăch ăp nău geh ta ntŭk, ntĭt nsa kơt phah tơm si rŭn in neh bri, nkoch trêng mât njrăng neh bri bah Công ty. Tâm yan mih hăn groi nđôi ăp nău kan kơt sreh n’ging an aih, joi ntăk n’ho hôm yan duh ri hăn rhŏ trong njrăng n’gang ŭnh sa, saơ ơm mô an ŭnh sa bri. Gâp ŭch nău kan tĭng kan dŭt lah jŏ đah Công ty”.

Lĕ geh âk rnôk Công ty TNHH Du ntŭk kan si ƀư n’ha rđaih miền Nam geh tâm nău wăk kol. Na nê̆ kơt năm 2005, yor mô geh prăk an mât chăm, muih koaih n’ha rpăi bri bah ntŭk kan ƀa ƀơ geh ŭch sa tâm yan wai. Ăp rơh geh ŭnh ƀoh, đê̆ đŏng lah rhiăng ha bri bah ntŭk kan geh ŭnh sa. Jêh nĕ tât lcang 2014 bri n’ho bah ntŭk kan lĕ tât rơh sŏk dŏng yơn mô dơn dơi Chính phủ rgâl nău ŭch tăch rgâl êng bah tăm bri si ƀư n’ha rđaih an tăm si têh... Lap lah jêr jŏt ri rlău đŏng.

Hăn ndrel 21 năm đah nău kan bri bah âk nar bôk năp ndâk njêng Công ty, nô Hoàng Văn Toàn, Groi Kruanh Ban tăm bri si ƀư n’har rđaih Ngọc Hồi, an gĭt ăp nău njê aƀaơ lĕ jêng nău uĕh, kơt nău tăm n’ho ta dôr yôk Sạc Ly, ntŭk lĕ tă nkual neh khĭt yor dak si hóa học Mỹ-Ngụy krih ta rơh tâm lơh tâm su:

 “Rnôk ntơm tât tăm ri lah nsum lĕ rngôch pih ja đah bom ta nĕ dŭt âk, rnôk he ntơm hăn gâp klach ngăn. Yơn tât aƀaơ saơ bri uĕh kơt nê rhơn ngăn he mô hôm mĭn lah jêng lôk bri kơt nĕ. Ăp năm dăch aơ ri dơh lơn yor geh trong hăn, bri lĕ têh jêng ăp năm dăch aơ dơh ŏk r’ah nkôp đah ăp năm bôk năp tăm bri”.

Dơh lơn, kơp bah rnôk geh nău kơl trok nkhôm ntŭk ntô bri, rlău 7.400 ha bri bah Công ty TNHH Du ntŭk kan si ƀư n’ha rđaih miền Nam mpeh tâm ntŭk trok nkhôm prăk. Ăp năm Công ty geh tay tơm prăk đăp mpăn gay trok an trong kan mât uănh n’hanh hun hao bri. Năm 2021, ntŭk kan dơi Tơm prăk nkrem mât njrăng n’hanh hunhao bri n’gor Kon Tum trok bơi 6 rmen prăk an ntŭk ntô bri. Năm 2022 kơp tât khay 8 mhe rlău rnoh prăk ntŭk ntô bri ma ntŭk kan lĕ dơi geh rlău 4 rmen 700 rkeh prăk. Aƀaơ bơi 8.200 ha bri, dŭt âk lah bri n’ho 3 n’ha ta 33 xă, nkuăl têh tâm 8 nkuăl jru ngai, nkual dŭt jêr jŏt bah n’gor Kon Tum dơi Công ty TNHH Du ntŭk kan si ƀư n’ha rđaih miền Nam mât uănh uĕh. Wa Trần Sỹ Hải, Kruanh UBND xă Đăk Kan, nkuăl Ngọc Hồi, an gĭt ta xă geh 1.200ha bri bah Bam tăm bri si ƀư n’ha rđaih Ngọc Hồi, mpeh tâm Công ty TNHH Du ntŭk kan si ƀư n’ha rđaih miền Nam. Wa Hải uănh lah preh trong kan tâm rgop mât njrăng bri n’hanh râng nău kan đăp mpăn rêh jêng bah ntŭk kan:

 “Xă đah Ban tâm ôp ndrel tâm nchră ƀa ƀơ. Geh nău ntoh lư mô lah ntoh ndal ăp nuĭh mha lăp tâm bri ri ban tăm bri tâm ôp đah xă đă rmôt Công an, Xã đội tâm rgop uănh nđôi ƀư tĭng nău kan. Rlău ma Ba ƀa ƀơ pah kan đăp mpăn nău rêh kon nuĭh ta ntŭk, an ndrôm sam ƀŭt an kon hŏk geh nău rêh jêr jŏt, râng ntop kơl jŭt jăng ngih rông mpông sa ta xă. Ban nsrôih tâm rgop đah xă nta an ăp rnăk râng trong kan mât njrăng bri. Đah rnoh neh bri bạch đàn mhe tăm năm bôk năp, năm tal 2 nta an ntop kơl an kônh wa manh neh nĕ gay tăm srah bum gay hun hao wăng sa”.

Ăp năm dăch aơ đah nău geh ăp năm bah nkra njêng tăch rgâl n’hanh nu nău ntŭk ntô bri, Công ty TNHH Du ntŭk kan si ƀư n’ha rđaih miền Nam lĕ mât uĕh nău kan bah 8 Ban tăm bri. Ndrel đah nĕ đăp mpăn nău kan wăng kăp rlăp sa, ntơm rgâl hao nău geh an 142 cán bộ, nuĭh kan n’hanh nuĭh pah kan. Mô knŭng ndrĭ năm 2021 Công ty lĕ tăm mhe geh 200 ha bri n’hanh năm 2022 lah 170 ha.

Khoa Điềm VOV Tây Nguyên

  Nuĭh rlang: Y Sưng Phê Ja