Tâm nkuăl jru Dak Glong, n’gor Dak Nông, nkuăl hvi, ƀon lan nkhah ngai, nau kan camera rnă njrăng geh ntrŭnh ƀư tâm ăp xã hŏ ƀư ueh nau tam tâm nau mât đăp mpăn tâm nkuăl, nkre rgop nau ƀư rgâl nau mơng, nau gĭt bah ƀon lan rnôk ƀư tĭng nau ntrŭnh bah pháp luật, ngăn lah rnôk hăn tâm trong.

Trung tá Vương Văn Khoa, Kruanh công an xã Dak Som, nkuăl Dak Glong, mbơh, ntơm bah tơm rgop nsum, xã nglăp dŏng geh 11 camera rnă njrăng tâm xã, ăp ntŭk trong hăn ndeh, ntŭk trong ndrâm duk nkuăl pâl n’aih Tà Đùng. Ntrong Camera geh nthoi đah công an xã, UBND xã, công an viên ndrel Kruanh thôn, ƀon gay ma uănh nau tât bah nau đăp mpăn. Camera rnă njrăng hŏ rgop nau ueh tâm nau kan njrăng, rdâng phung tih dôih, đăp mpăn tâm nkuăl. Ndrel tă bah nau kan geh uănh tâm camera, rmôt công an xã gŏ tâm rgop joi ndrel leo che ranh 73 năm tâm xã Quảng Khê hyơt trong hăn sĭt ngih. Ntơm bah nau kan aơ, công an xã Dak Som dôl ma lŏ ƀư pơk hvi lơn tay nau kan camera rnă njrăng tâm ăp nkuăl ƀon lan:

‘Ntơm rnôk geh công an xã ntrŭnh ƀư nglăp dŏng camera ri ăp nau tât tih tâm lam xã geh n’huch âk ngăn. Kŏ tă bah camera aơ ri hên saơ dơi du hê che ranh hăn hyơt tă bah Quảng Khê lăp tât”.

Kŏ tâm kơt ma xã Dak Som, tât rnôk aơ công an xã Quảng Khê, nkuăl Dak Glong, hŏ rnglăp dŏng geh 19 camera rnă njrăng tâm ăp trong tơm, ntŭk âk ƀon lan. Thiếu tá Phạm Ngũ Lạng, Kruanh công an xã Quảng Khê, mbơh, xã dôl ma ƀư ueh ăp nau gay ma rnglăp tay 13 camera, tŏng dơi nau ŭch mât bah nkuăl:

‘Khay 10 năm 2022 phung hên ntrŭnh ƀư ân dĭng lĕ nau rnglăp ăp camera rnă njrăng, ri ntơm bah rnôk nê tât rnôk aơ tâm nkuăl mô hôm geh nau tih tay ôh, ăp ntil phung tih dôih kơt lah tâm lơh, jêh ri bu ndăm tâm bri măng pâl la ir tâm ăp ntŭk geh âk nŭih hŏ n’huch. Ndrel ngăn lah nau ma ăp kon se hăn trong ma mô ndâu mô n’gang bôk, nchuăt ndeh hăn ngăch ir, nẹt pô...ri kŏ mô hôm geh kơt ntơm nơh ôh”.

Trong Camera rnă njrăng ƀư ueh tam mô êng kơl an mrôt mât đăp mpăn tâm nkuăl, ma hôm rgop nau rgâl nau mơng, nau mĭn bah nŭih ƀon lan nkuăl jru ngai Dak Glong tâm nau kơt tĭng nau ntrŭnh bah pháp luật, ngăn lah rnôk hăn trong. Nau săk tam ngăn lah nau mât rnă njrăng đăp mpăn tâm nkuăl gay ma ƀon lan đăp mpăn pah kan jan sa. Wa Trần Đình Hưng, tâm thôn 1, xã Dak Som, nkuăl Dak Glong, rhơn nkoch:

‘Ta aơ ri nau mât rnă njrăng ueh, jŏ jŏ mơ geh bu ntŭng so dơm. Yơn ntơm rnôk geh camera rnă njrăng ri nau đăp mpăn ta aơ saơ geh tam ngăn đŏng”.

Tĭng công an nkuăl Dak Glong, tât rnôk aơ, nau kan camera rnă njrăng hŏ geh ntrŭnh ƀư tam 7 xã tam nkual, đah 100 ntŭk. Thượng tá Nguyễn Xuân Hùng, Kruanh công an nkuăl Dak Glong, mbơm đah ăp nau dơi geh ngăn, công an nkuăl dôl ma lŏ bonh đă nau rgum rgop bah ăp ntŭk gay ma lŏ ntrŭnh ƀư nau rnglăp âk camera bah âk ntŭk:

‘Phung hên ndơn saơ nau tam bah nau kan njrăng rdâng phung tih dôih kŏ kơt lah nau ndâk ăp nau kan, nau ƀư lam ƀon lan mât rnă njrăng đăp mpăn neh dak. Bol ma lah du nkuăl ach o yơn đah nau nsôih prêh, công an nkuăl rđau công an ăp xã tâm rgop nsum đah ăp nkuăl ƀư ueh nau kan tâm rgop nsum gay ma ndâk ƀư nau kan dŏng camera rnă njrăng tâm lam nkuăl”.

Tâm nkuăl jru Dak Glong, nkuăl hvi, ƀon lan tâm nkhah, nau kan leo dŏng Camera rnă njrăng geh uănh kơt lah “tôr măt” bah rmôt kan công an, hŏ ndrel ma dôl ƀư săk tam tâm nau kan njrăng, rdâng đah ăp ntil phung dôih dôih, đăp mpăn rnă njrăng êng... Nkre lah, nau kan aơ hŏ ƀư ueh dơi n’hâm dăng bah lam ƀon lan râng tâm nau ƀư nau kan lam ƀon lan mât rnă njrăng neh dak./.