Ôi 15/3, wa  Trương Hải Long Kruanh UBND n’gor Gia Lai hŏ ntăm siƀŭt n’glêh an bah UBND n’gor ntăm n’hao geh năm ton đah wa Lý Minh Thái- Groi Giám đốc mât bôk kan Sở Y tế, ƀư Giám đốc Sở Y tế n’gor Gia Lai.

Wa Trương Hải Long đă wa Lý Minh Thái ngăch lăp tâm nău  kan ta ntŭk gŭ kan mhe, lah ntŭk rgum tâm rnglăp, ƀư jăp pah kan mât uănh ƀĭt juet, dăp rgum tay ăp tŏng rmôt cán bộ y tế; nsrôih ƀư lôch jêh uĕh ăp nău dơn  kan  dơi  jao, n’hao săk tam mât chăm n’hâm suan nuĭh ƀon  lan ta n’gor, nkre rdâk n’hao tay nău săk blău kan an rmôt dak si; n’hao nău dơi rđău kan, mât uănh, rđău  đă ăp đơn vị ƀư jăp pah kan mât dŏng êng tơm prăk kaih rgop njêng geh tơm wăng sa n’hanh n’hao geh nău rêh an cán bộ, y, bác sĩ, nuĭh kan n’gâng kan dak si; an ƀư geh nău tam  Đề án hun hao lam trong kan dak si n’gor Gia Lai tât năm 2030.