Ta nkuăl n’har bri Ea Súp, n’gor Dak Lak, duh phang jŏ jong khay bah năp lĕ ƀư nuĭh ƀon lan mô tyŏng dak dŏng hô. Rmôt tahen, Công an ta ntŭk dôl rdêng dak tĭng ndeh dak ntop kơl an kônh wa đăp mpăn nău rêh. Tâm nklăp 2 pơh bah năp, tât 2-3 nar, ăp tahen, công an gŭ ta ntŭk lŏ rdêng dak tât ntop kơl kônh wa geh dak dŏng.

Ăp xă n’har bri ta nkuăl Ea Súp lah nkual duh phang hô bah n’gor Dak Lak. Ăp năm tâm rnôk duh phang hô lŏ geh nău mô tŏng dak dŏng, yơn năm aơ nău mô tŏng dak tât ơm lơn n’hanh hô lơn. Bah jêh Tết âm lịch, rmôt tahen, công an gŭ ta ntŭk lĕ ntơm rdêng dak hăn ntop kơl an kônh wa nkual duh phang.

Thiếu tá Đoàn Huy Tưởng, Kruanh Công an xă Ea Rvê, nkuăl Ea Súp, n’gor Dak Lak an gĭt, ăp nar ăp thôn, ƀon mbra uănh săk ăp rnăk mô tŏng dak. Jêh nĕ, Công an xă ƀư trong nchrăp tâm rgop đah Mpôl wăng sa mât njrăng bri dak 737 (Quân khu 5), tâm pleh rdêng dak tât ntŭk an kônh wa.