Ngih jay bâh wa ĐặngThị Duy Hiền, thôn Thành Nam, xã Suối Dầu, n’gor Khánh Hoà geh rlâm tâm rơh mih dak buk têh mhe nơh. Đah nău kơl kan bâh n’gâng kan ta ntŭk n’hanh tahen, wa Đặng Thị Duy Hiền lĕ ntơm ƀư tay jay mhe. Nău rdâk ƀư jay mhe geh âk nău jêr yor mô tŏng nuĭh ƀư, mô tŏng ndơ ƀư n’hanh trôk nar mô ueh lăng. Ta năp nău jêr nĕ, cán bộ, tahen Đại đội trinh sát Cơ giới 1, Bộ chỉ huy Quân sự n’gor Khánh Hoà geh ƀư “Nău kan Quang Trung” lĕ tât râng ngăch, nchoăn rdeng drăp ndơ, tâm rgop săk soan ƀư ndơm lŭ ƀư jay mhe. Kanŭng du ƀlât dơm, jay mhe lĕ ntơm jêng, nsĭt nău rhơn n’hanh nău đăp mpăn pah kan tay đah wa Đặng Thị Duy Hiền. “Geh ngih dak pă kơl an jay gâp ƀư tay jay mhe ta aơ. Gâp lah ueh ăp n’gâng kan ntŭk kan lĕ kơl an gâp ƀư jay geh ntŭk gŭ ta năp tết Nguyên đán. Nuĭ kan lah bộ đội geh tât  30% lĕ rnoh prăk ƀư jay, jêng gâp dŏng rnoh prăk aơ gay ma rvăt tay ndơ ƀư lôch ueh jay”.

Ăp nar ba năp, hạ sĩ quan Nguyễn Hoài Nam, pah kan ta Đại đôị Trinh sát Cơ giới 1, Bộ chỉ huy quân sự n’gor Khánh Hoà, way dŭt ndăn tâm ăp nău kan. Lĕ nchoăn lŭ, nô ntrôl ndeh mpli choih ndrel đah ăp oh nô ƀư lôch ndơm lŭ jay mhe. “Trôk nar bar pe nar aơ way geh mih ta kêng măng yơn cán bộ, tahen hên hôm nha nsrôih ƀư lôch ngih jay ta năp nău nchrăp. Nĕ lah nău dơn kan bâh hên nơm”.

Jay bâh wa Lê Thị Đã, ta tổ dân phố 1, phường Đô Vinh, n’gor Khánh Hoà, lĕ bơi ƀư lôch. Nău rhơn mpơl na nê̆ ta muh măt bu ur lĕ tă geh âk nău roh jot tâm rơh mih dak buk mhe nơh. Nô Võ Văn Tâm, kon bu klô wa Lê Thị Đã mpơl nău rhơn rnôk tahen geh sĭt kơl ƀư tay ngih jay an rnăk vâl nơm. “Mih sial dak buk mhe nơh, jay mê̆ rlâm lĕ rngôch. Bâh geh n’gâng kan ta ntŭk n’hanh trung đoàn 896 kơl an rnăk vâl dŭt âk. Aƀaơ, jay lĕ geh ƀư bơi lôch đăp mpăn hôm”.

Ƀư tĭng nău kan Quang Trung” yor Thủ tướng Chính phủ rgŏ jă, N’gâng kan leo kan tahen n’gor Khánh Hoà tâm rgop đah ăp ntŭk kan đơn vị nkual 4 Hải quân, lữ đoàn đặc công 5 lĕ rgum geh 70 rmeôt kan rdâk njêng, đah bơi tât 1.150 cán bộ, tahen ndrel đah âk ndeh klư, ngăch ndăn sĭt ta ntŭk geh nău khuch khat gay ma kơl an ƀon lan ƀư tay ngih jay geh khuch tă phŭt sial.

 Mô dơn ƀư tay ngih jay, mpôl kan tahen hôm nha ndâk nsơm tay nău knơm an ƀon lan nkual geh dak buk. Bâh ăp ntŭk rlâm chah, roh jot  tă phŭt sial dak buk, du nău rêh mhe dôl tnơm njêng ta ƀon tơm Khánh Hoà- nâp nâl lơn, ueh răm lơn, tâm nău tâm rŏng tahen ƀon lan nâp nâl.