Ôi 10/5, ta Hà Nội ƀư tâm nchră đăm gĭt n’hanh an tĭng ƀư Nghị quyết 41 bah Bộ Chính trị mpeh rdâk njêng n’hanh ntik n’hao nău khlay kan bah doanh nhân Việt Nam tâm rơh mhe. Siƀŭt mbơh ta tâm nchră, Thứ trưởng Bộ Kế hoạch n’hanh Đầu tư Trần Duy Đông an gĭt, Chính phủ mhe n’gluh an dŏng Nghị quyết mbrô 66 mpeh bôk nău kan bah Chính phủ tĭng ƀư Nghị quyết mbrô 41 bah Bộ Chính trị.

Tĭng nê, nău ŭch ntơm bah aơ tât năm 2030, geh dŭt đêt 2 rkeh doanh nghiệp, tâm nê jêng n’hanh hun hao âk doanh nhân kruanh rđău kan ăp tập đoàn wăng sa têh dăng, săk geh, geh suan tâm rlong ta ntŭk tăch rgâl tâm dak n’hanh dak bah dih, ntik n’hao nău khlay kan pơk trong leo ăp n’gâng kan, ăp trong kan  bah jâng wăng sa. Lah ta rnôk rđău đă tâm nchră, Kruanh Ban Tuyên giáo Trung ương Nguyễn Trọng Nghĩa lah rjăp, gay Nghị quyết 41 bah Bộ Chính trị ngăch lăp tâm nău rêh, ân rgâl mhe tay trong leo ƀư, an tĭng ƀư; uănh khlay tĭng groi nđôi, ntrŭt ntrôl, ôp uănh; nchrăp an dŭt uĕh ăp ndơ geh, tơm ndơ đah nău nsrôih chính trị âk, nsrôih têh gay tĭng ƀư geh nău dơi Nghị quyết.