Ƀư kan tâm 2 nar lơ 19 n’hanh 20/12 tay, Rơh tâm nchră lah du nău kan khoa học- nău kơl kan geh nău khlăy ngăn đah trong kan  hun hao bâh n’gor Lâm Đồng tâm rơh mhe. Lĕ geh 21 ndơn kan ăp ntŭk kan leo kan lam ntur neh n’hanh 10 ndơn kan Đaị sứ quán uănh năl tât râng tâm nchră. Wa Đinh Văn Tuấn, groi kruanh UBND n’gor Lâm Đồng, an gĭt, mpeh nkual neh gôl yôk Di Linh ntơm bâh jâng yôk nque Bảo Lộc tât jâng yôk Prenn, geh nkuăl ƀon têh Bảo Lộc n’hanh 5 nkuăl: Bảo Lâm, Di Linh, Đức Trọng, Lâm Hà, Đơn Dương, geh tât 50% rnoh neh n’gor Lâm Đồng ơm. Lôch nglăp nsum 3 n’gor Đăk Nông, Bình Thuận n’hanh Lâm Đồng, gôl yôk Di Linh geh rnê lah nkual neh rgum lĕ tŏng ăp nău dơi geh n’hanh nău ơm geh, mih sial, neh ntu, ntŭk ntô ueh, ŭnh nar kloh nđir n’hanh ta ntŭk trong hăn let nkual.