Lôch rnôk Đại hội đại biểu lam dak tâl 14 bah Đảng dŭt jêh uĕh lăng, kêng măng 26/1, Kruanh Quốc hội Trần Thanh Mẫn hŏ ƀư tơm Tâm nchră mbơh ngăch lôch jêh Đại hội đại biểu lam dak tâl 14 bah Đảng. Ntơh măt Đảng ủy Quốc hội, Groi Kruanh Rnâng kan Quốc hội Đỗ Văn Chiến hŏ mbơh ngăch lôch jêh bah Đại hội Đại biểu lam dak tâl XIV bah Đảng.

Mpeh rnoh tât hun hao 2026 - 2030 n’hanh trong uănh tât 2045, siƀŭt mbơh hŏ n’gluh 5 trong rƀŏng têh, tâm nê lah rjăp, lvang năm 2026 - 2030 ân rgum đăt ndal dăng ta 3 trong kan geh nău n’glêh an: đăt ndal mpeh trong tĭng n’hanh kơt dŏng ngăn: Wat jêh ăp kôp pháp luật; n’hao săk tam trong kơl; n’hao dăng tĭng jăp dŏng ƀư; đăp mpăn ăp trong nchrăp têh geh trong tor gĭt lor, tơm ndơ n’hanh trong groi nđôi nău tĭng ƀư; ntrôl dăng rgâl dơh glêh siƀŭt; rdâk njêng Chính phủ mbrô; sŏk nău nsĭt geh rhŏ dŏng ƀon lan n’hanh doanh nghiệp ƀư mâng weh. Nău dơi dŭt uĕh lăng bah Đại hội XIV mpơl nău nsing nơm, nău mĭn sŏng di, nău nsrôih n’hanh trong uănh jong hun hao mhe bah Đảng n’hanh rnoi nuĭh he. Aơ lah jâng ntơm nâp gay lam Đảng, lam ƀon lan, lam tahen he ƀư tơm êng trong nchrăp têh jong, nsing nơm, nsrôih ndôr êng, hăn dăng tâm rơh hun hao mhe, tĭng ƀư geh nău dơi Nghị quyết Đại hội XIV, yor du dak Việt Nam bah tâm lơh tâm su, đăp mpăn, tâm ban, ndrŏng dăng, hun hao uĕh lam, rsang rnglay, rhơn răm.