Ân geh ăp trong nkra ăp kôp, lĕ n’hâm suan lơn, lơn lah đah ăp nkual thôn ƀon, gay têk hŭch đêt tâm  tom ndeh, aơ lah nău lư ta tâm nchră uănh năl ngăn geh, nkô̆ jêng tâm tom ndeh bah n’gor Dak Nông. Lôch 2 năm hŭch mbro tâm tom ndeh, tâm 5 khay bôk  năm 2024 nô nău tâm tom ndeh ta n’gor Dak Nông tât krit hô, đah 57 tơ̆ tâm tom lơh 37 nuĭh khĭt, 38 nuĭh rmanh. Rđĭl đah ndrel khay dja năm 2023, tâm tom ndeh ta Dak Nông hao lĕ mpeh rnoh âk tơ̆, rnoh nuĭh khĭt n’hanh nuĭh geh rmanh.

Nkô̆ tơm lah tă bah nău gĭt êng pháp luật bah nuĭh ƀon lan râng hăn ntung trong hôm đêt, nău nkra bah ăp nău khoah mpeh leo ƀư hăn ntung trong ta n’gor mô hŏ năn ngăch. Bah meng nê, pah kan nsum đah ăp  nhih pah kan  dơi kan hôm mbrơi, nău mha êng ta nkual Tây Nguyên nuĭh ƀon lan dŏng ndeh công nông, ndeh máy têk dŏng an  nău kan tuch tăm yơn ndeh mô geh đăng ký đăng kiểm nha hôm  râng hăn ntung trong đŏng ….

Aơ lah ăp nkô̆ ƀư jêng tâm tom ndeh ta ăp trong ƀon ta Dak Nông hao âk (hao 13 tơ̆), tâm rnôk tâm tom ndeh ta trong me lah Quốc lộ 14  (trong Hồ Chí Minh) hŏ dơi mât kân đêt (hŭch 9 tơ̆ rđĭl đah ndrel khay dja năm 2023).

 Mpeh ăp  trong nkra mât đăp mpăn hăn ntung trong tâm let năp tay, Thượng tá Phạm Quốc Lập, Kruanh Jrô kan cảnh sát hăn ntung trong - Công an n’gor Dak Nông an gĭt, đơn vị hŏ lor nchrăp ra uănh tay, dăn đă n’gâng kan ta ntŭk n’hanh ăp n’gâng kan dơi kan lăp kan, n’hao dăng pah kan nkoch trêng mbơh gĭt lam hvi pháp luật, n’hao dăng pah kan hăn rsong uănh nkra rmal nău tih đăp mpăn hăn ntung trong, rgŏ  jă lam ƀon lan râng ban saơ mbơh gĭt nău lư ăp nuĭh tih mpeh đăp mpăn hăn ntung trong.

“Lơn lah đah ăp njăr trong tỉnh lộ, trong nkuâl, trong mbluh xã way geh tâm tom ndeh, ntơm nơh he mô hŏ uănh khlay âk ri  aƀaơ ân uănh khlay lơn n’hanh ƀư lĕ n’hâm suan lơn, tĭng ƀư ăp trong nkra ăp kôp lơn, ăp mpôl kan lăp kan âk lơn bah n’gor tât nkuâl  n’hanh xã gay rgop ƀư hŭch bah tâm tom ndeh ri nău nkoch trêng lah jâng nsing, nău gĭt êng bah nuĭh ƀon lan tĭng jăp ri nău rsong hăn mbra jăp di lơn”./.