Jêh 40 năm rgâl mhe, ăp nau kan têh, geh nau khlay mpeh hun hao văng sa-rêh jêng, mât nâp đăp mpăn chính trị, đăp mpăn neh dak-rnă njrăng ndrel tâm rnglăp lam ntur neh jru hvi hŏ ƀư nâp nâl, ƀư ueh nau rnơm bah ƀon lan đah Đảng, nau ngăn tâm Tây Nguyên lah nau mpơl saơ âk trong tâm di ngăn nê. Nŭih ƀon lan nkuăl rnoi mpôl đê̆ mpŏng đah nau dơi bah Đại hội 14, ăp nau ntrŭnh geh tât nau dơi ƀư nau kan jŏ jong mra geh ntrŭnh ƀư ân ngăch. Nô Y Sắc Ly Arul, gŭ tâm Phường Buôn Ma Thuột, n’gor Dak Lak ntoh nau ŭch, ăp nau ntrŭnh khlay bah Đảng mra ơm geh ƀư ngăn, njêng nau ntrơn rgâl ueh nâp tâm hun hao văng sa, rêh jêng, ngăn lah đah nkuăl rnoi mpôl đê̆:

‘Gâp ŭch Đảng ndrel Ngih dak lŏ uănh kơl an âk lơn tât kônh wa ƀon lan rnoi mpôl đê̆, tâm nê geh rnoi Rđe phung hên, uănh khlay tât nau mât, nau ndray ndrel ƀư rêng ueh tay nau vay ơm yau bah nơm, ndrel ma nau hun hao pâl n’aih, gay nau rêh nŭih ƀon lan nar lơn ma geh n’hao prêh’.

Tâm ăp năm rlau aơ, nau kơl an bah Đảng ndrel Ngih dak bah ăp nau ntrŭnh, ntrong kan tâm di trong ngăn hŏ njêng jêng ăp nau rgâl mhe ueh ngăn tâm nau rêh bah kônh wa ăp rnoi mpôl đê̆.  Ntơm bah ntŭk ntu gung trong, ntĭm nti, dak si tât nau kơl nau kan tuch tăm, n’huch ach o nâp nâl, mât nau vay ơm ueh...âk nau ntrŭnh kan hŏ geh lăp tâm nau rêh, leo tât nau săk geh kloh rjăp, geh ƀon lan tâm ban nuih nuih n’hâm, kơl an. Tâm nau rhơn geh nau dơi bah Đại hội 14, wa Hmên, nŭih ƀon lan ƀon Tươh Ktu, xã Đăk Đoa, n’gor Gia Lai, ngơi:

‘Gâp saơ rhơn ngăn, dŭt n’hâm ŭch ngăn yor rđau kan Ngih dak mro kơl an mbơh luh ăp nau ntrŭnh tam khlay, ngăn lah ăp nau ntrŭnh ân an nkuăl rnoi mpôl đê̆, hŏ kơl an ăp ntil ân kônh wa ƀon lan hên. Gâp rnơm lah: tât aơ tă Đảng Ngih dak lŏ kơl an, lŏ rđau đă neh dak hun hao tayk, kônh wa nơm du nuih n’hâm kơl an. Đảng mra geh ăp nau ntrŭnh kơl an ân tâm di gay neh dak nar lơn hun hao nâp rjăp lơn”.

Ntơm bah nau ngăn tâm nau rêh, cán bộ, đảng viên ndrel ƀon lan ăp n’gor ta Tây Nguyên-Nam Trung bộ rnơm ngăn Đảng nơm lŏ ƀư jêh ăp nau ntrŭnh kơl an tĭng trong hun hao nau tơm dăng, sŏk ƀon lan ƀư tơm bah nau kan hun hao, ntơm bah hun hao pâl n’aih nsum mpôl tât n’hao nau ê nkra ntuh kơl ntŭk ntu,  đăp mpăn nau rêh nâp nâl bah năp nau rgâl mhe trôk nar. Wa Rơ Châm H’Yeó, Kruanh Uỷ ban MTTQ Việt Nam n’gor Gia Lai lah rjăp, nau rnơm tâm Đảng hŏ geh bun dăp bah ăp rơh ndrel rnôk aơ lŏ geh ƀư ueh tay:

‘Kônh wa Tây Nguyên mro du nuih n’hâm tĭng Đảng, tĭng Wa Hồ. Ŭch Đảng nơm lŏ kơl an, pơk trong nơih ân Tây Nguyên hun hao văng sa, văn hoá, ntĭm nti, đah nau kan ndâk njêng Tây Nguyên sâm geh mpeh văng sa, blau âk mpeh nau kan nau mhe”./.