Tây Nguyên dôl tâm hô yan duh phang, rnoh dak ta ăp dak me, dak diăng dôl hŭch ngăch, du đêt ntŭk lĕ kroh tu dak. Nău kan tuch tăm mât rong ăp ntŭk dôl đah nuĭh ƀon lan ndăn mbơh ƀư ăp trong mkra, đăp mpăn, săk rnglăy tuch tăm.

Jêh âk khay duh phang hô, n’glău Đan Kia-Suối Vàng, tu dak têh ngăn bah dâng jâng yôk Lăng Biang lĕ kroh. Neh bŏk n’glău đang đŏng. Tuch tăm tâm nkual tŏ bah n’glău, kônh wa ƀon lan ta nkuăl têh Lạc Dương, nkuăl Lạc Dương, n’gor Lâm Đồng na nao an nthoi tay dĭng dak, hăn tât dak diăng hôm nkân ta ntŭk ma âk khay bah năp hôm e jâng n’glău jru. Wa Cil Mên, ta nkuăl têh Lạc Dương an gĭt yan duh phang năm aơ jŏ jong rlău ăp năm, dôl ntêt nkri hô mir tơm tăm bah rnăk wâl:

Kơt ăp năm ri aƀaơ lĕ geh mih hôm, aƀaơ ri mô geh du tơ̆ mih. Nuĭh ƀon lan dôl rvê ma mô gĭt m’hâm ƀư, ngăn lah jay mir lah mô geh dak tŏ ri tơm tăm mbra khĭt lĕ.

Yor duh phang hô đŏng, lĕ rngôch tơm tăm ta ndrĭch mir thôn Đoàn Kết, xă Ayun Hạ, nkuăl Phú Thiện, n’gor Gia Lai, lĕ khĭt kro. 80 ha ba lŏ ta aơ lĕ kro, mô hôm dơi geh kơl tay. Wa Vũ Văn Khiển, nuĭh ƀon lan thôn Đoàn Kết, an gĭt, yan ba wai aơ, rnăk wâl wa srih tăm 12 ha ba đah rnoh prăk ntuh kơl bơi 400 rkeh prăk, yơn duh phang geh roh lĕ bhiău:

Yor năm aơ yan mih lĕ ơm. Ta aơ tuch tăm dŭt âk knơm tĭng tu dak bah dak dianưg Ake. Tĭng mĭn kơp yan bah mpôl hên ri geh n’gul yan, đah mông aƀaơ ăp năm ri hôm e dak tŏ, yơn aƀaơ năm aơ dak diăng lĕ dak jêng geh nău ba kro kơt aơ.

Ta nkuăl Krông Nô, nkual “rđung duh phang” ta n’gor Dak Nông, năm aơ nu nău geh hô rlău âk năm. Rnoh dak ta lĕ 33 dak bât lĕ hŭch jru, du đêt ntŭk lĕ kroh. Wa Doãn Gia Lộc, Kruanh jrô kan tuch tăm mât rong n’hanh hun hao ƀon lan nkuăl Krông Nô, an gĭt, nkuăl dôl nchrăp pah kan đah ăp ntŭk kan mât uănh ăp n’glău, dak bât ta bah dâng ăp dak me têh gay pă dak an ăp nkual tuch tăm rgum. Tâm nĕ, ăp n’glău thủy điện an pơk dak sĭt bah dâng n’ăp rnôk mô pơk điện:

Mô hô ngăn rnôk điện măt nar ntưm bil ri an rgŏ jă ăp rmôt măy thủy điện. Mpôl hên an tâm rgop Thủy điện Buôn Kuốp, bah rnôk 10h ôi tât 3 mông kêng măng công ty rlu, yơn bah 3 mông kêng măng tât 9 mông bah kơi công ty mbra ƀư pă dak rhŏ an tuch tăm, bôl geh nglăp măy đŏng lah mô.

Tĭng wa Trần Văn Khánh, Giám đốc Công ty Thủy điện Buôn Kuốp-ntŭk kan mât uănh 3 ngih măy thủy điện ntung gung ta nkual bah dâng dak me Krông Nô, hoch rlău 2 n’gor Dak Nông n’hanh Dak Lak, an gĭt, năm aơ nău El Nino dŭt na nê̆. Rnoh mih n’hanh rnoh dak sĭt ăp n’glău dŭt đêt nkôp đah ăp năm bah năp. công ty lĕ pah kan đah ăp nkuăl ta 2 n’gor Dak Lak n’hanh Dak Nông gay gĭt nu nău mpeh nău ŭch dŏng dak bah ƀon lan. Bah nĕ, ƀư trong nchrăp tâm pă dak tĭng trong pơk dŏng ăp n’glău n’gâr lĕ dơi Thủ tướng Chính phủ uănh an.

Ƀư tĭng Ntĭm đă bah Thủ tướng Chính phủ n’hanh ăp sam ƀŭt bah ăp n’gor Dak Lak, Dak Nông mpeh nău rdâng đah geh duh phang, mô tŏng dak, mpôl hên tâm rgop gay tŏng ăp pă dak.

Duh phang yan wai, bah jŏ lĕ jêng ntŭl rlong têh an nău rêh, tuch tăm ta nkual Tây Nguyên. Yơn rgâl trôk nar, roh bri ƀa ƀơ, dôl ntêt nkri rnă njrăng tu dak. Ăp n’gor dôl tâm rgop âk nuĭh drăp ndơ, mbơh ƀư âk trong mkra gay njrăng n’gang duh phang săk rnglăy, n’hŭch đêt khuch an tuch tăm.

Tĭng Ntŭk nchroh mbơh mih sial nkual Tây Nguyên, tâm âk khay bôk năm 2024 rnoh mih dŭt âk ta Gia Lai đêt lơn rĭng âk năm. Bah dŭt năm 2023 têt aƀaơ, rnoh dak ta ăp dak me hŭch mbrơi mbrơi n’hanh geh nu nău hŭch âk tu dak tĭng ntŭk ta du đêt ntŭk mô nchrăp tu dak tŏ n’hanh ngai ăp ntŭk dak bât.

Tĭng nĕ, rnoh dak ta dak me Ba n’hanh dak me Ayun geh trong hŭch, dĭng lĕ rnoh dak hoch đêt lơn bah 31-49% nkôp đah rĭng âk năm. Nchroh mbơh bah aƀaơ tât khay 5-2024 duh phang hôm e geh n’hanh duh hô mbra geh n’hanh pơk hvi. Tâm khay aơ ăp dak diăng n’gor Gia Lai geh âk mô tŏng tu dak âk. Jêng tât duh phang tĭng ntŭk ta du đêt nkual mô dơi nchrăp dak tŏ n’hanh ngai ntŭk dak bât. Ntŭk kan aơ nchroh mbơh đŏng bah dŭt khay 3 mbra geh duh phang lam hvi ta Gia Lai.