VOV4.M'nông: Ta nkual Tây Nguyên, n'gâng kan ta ntŭk n'hanh n'gâng kan dơi kan dôl rgum an ƀư ăp trong rdâng lơh đah phŭt mbrô 4. Ôi 27/9, n'gor Kon Tum hŏ njêng 3 mpôl hăn pah kan tât ăp nkuâl geh ma nău tât khuch hô tă bah phŭt mbrô 4 lơh gay kơp uănh tay ăp tŏng lam lĕ rngôch. Ăp nkuâl bah n'gor Kon Tum dơi năl mbra geh tât khuch hô rnôk phŭt mbrô 4 ntô̆ lăp  tâm neh kơt, lah: Đăk Glei, Tu Mơ Rông, Kon Rẫy n'hanh Kon Plông.

N'gâng kan ta ntŭk n'hanh n'gâng kan dơi kan ntrơn du ngăn ăp nuĭh ƀon lan luh bah nkual geh ma nău rlâm neh âk tât ntŭk đăp mpăn. Ta Gia Lai, Công ty truyền tải điện Gia Lai ƀư uănh năl ăp ntŭk geh tât khuch hô, nkra têh uĕh, koch n'hong dak sor gay đăp mpăn bah dak rchoh, pĭch rlâm neh. Ta Dak Lak, lah n'gor geh rnoh dak bât dŭt âk Tây Nguyên, jêng pah kan mât uănh n'glău dak bât êng uănh khlay, đăp mpăn nchuăt dŏng, tâm pă dak n'hanh njrăng n'gang bah dak bŭk rnôk phŭt ntô̆ lăp. Hôm n'gor Lâm Đồng hŏ rđău đă ăp công ty dôl mât dŏng ăp n'glău dak bât thủy điện đăp mpăn tĭng ƀư jăp ăp nău way./.

VOV Tây Nguyên

Nuĭh rblang: Điểu Thân