Năm nti 2024-2025, n’gor Đăk Lăk geh 12/53 ngih nti THPT công lập ƀư tĭng nău tâm rlong săch lăp jrô 10, hao 9 ngih nti đah năm nti ba năp. Bol ma rnoh ngih nti ƀư thi hao âk, yơn rnoh kon hoc dăn râng thi lăp ta ăp ngih nti hôm nha âk.

Tâm nĕ, dŭt âk lah ngih nti PTTH chuyên Nguyễn Du geh rlău 1 rbăn kon hoc râng thi, rnoh săch râng geh 1/3. Êng môn tiếng Anh geh rnoh tâm rlong dŭt âk lah 1/6 . Rơh tâm rlong săch lăp nti jrô 10 năm aơ, lam n’gor Đăk Lăk geh rlău 7.800 kon hoc râng thi ta 12 ngih nti, geh ƀư tâm ăp nar 7 n’hanh 8/6. Tĭng nău nchrăp, nău chấm thi dŭt mbrơi lah nar 14/6, mbơh điểm n’hanh rnoh kon hoc lăp nti ta nar 21/6.