Ôi aơ 7/3 (tĭng mông ta ntŭk), Thủ tướng Australia Anthony Albanese n’hanh I ur hŏ ƀư tơm lễ wơt Thủ tướng Chính phủ Phạm Minh Chính n’hanh I ur ndrel mpôl ntơh măt gưl têh Việt Nam khâl ngăn Australia ntơm bah nar 7 tât nar 9/3.

Lễ wơt dơi ƀư têh khlay bah Jay Quốc hội gŭ ta yôk  Capital ta Thủ đô Canberra bah Australia, tĭng nău way mha êng an nuĭh mât bôk kan Chính phủ khâl ngăn Australia. Tâm mông nar răm mƀak tâm rnglăp, Thủ tướng Anthony Albanese jă Thủ tướng Phạm Minh Chính hao ta bục danh dự lah rnôk 19 tong đại bác n’gloh lam yôk Capital. Cờ  dak Việt Nam dơi têk hao wơt Thủ tướng Phạm Minh Chính n’hanh I ur n’hanh mpôl ntơh măt gưl têh Việt Nam.

Lôch wơt, bar thủ tướng ƀư tâm nchră. Thủ tướng Australia n’hanh Thủ tướng Phạm Minh Chính ndrel uănh saơ Lễ tâm  rgâl ndơ siƀŭt tâm boh; nkre mâp báo chí nsum  mbơh lôch jêh tâm nchră, tâm nê mbơh tâm boh têh jong lam lĕ rngôch Việt Nam – Australia.

Tâm 2 nar râng rƀŭn gưl prêh khlay di nkah 50 năm nau tâm boh ASEAN-Australia, Thủ tướng Chính phủ Phạm Minh Chính hŏ dŏng âk mông gay mâp ăp rđau kan kan gưl prêh ăp dak ASEAN, Australia, Niu-di-lân ndrel Tổng thư kí ASEAN.

Tâm nar mâp, Thủ tướng Chính phủ lah ueh nau tâm boh, kơl an, tâm pă mbơh nau tă blau nau kan bah ăp dak tâm nau ndâk njêng ndrel hun hao văng sa, ntoh nau ŭch ntrŭt dăng nau tâm boh tâm ăp n’gâng kan  tơm khlay bah ASEAN ndrel nau tâm boh Việt Nam đah ăp dak, ngăn lah mpeh chính trị-tâm nchră, văng sa, tăch rgâl, rnă njrăng, neh dak, ntĭm nti, khoa học ndrel công nghệ... Lŏ tâm boh rjăp gay ndâk du ASEAN tâm rnglăp, tâm ban, n’hao nau tâm boh ăp rmôt, ƀư ueh nau kan tơm tâm rklaih ăp nau kan đăp mpăn, nau kan tâm nkuăl. Di rnôk aơ, Thủ tướng Chính phủ hŏ jă rđau kan ăp gưl ăp dak ntoh măt Kruanh n’gâng kan râng tâm nchră nau geh dơi bah ASEAN nchrăp ƀư ta Hà Nội lơ 23/4/2024./.