Tâm ôi lơ 8/11, ta Cung Hòa Bình ta thủ đô Phnom Penh, Thủ tướng Chính phủ Campuchia Samdech Techo Hun Sen ƀư tơm wơt na nê̆ Thủ tướng Chính phủ Phạm Minh Chính n’hanh Mpôl đại biểu gưl prêh Việt Nam khâl na nê̆ dak Campuchia. Jêh wơt, 2 Thủ tướng ƀư rgum nchră na nê̆. Bah năp nĕ, jêh rnôk tât jâng ta dak Campuchia, Thủ tướng Chính phủ Phạm Minh Chính lĕ tât an nkao ta Đài Độc lập, Rup ndah ndrô Kđăch Norodom Sihanouk, Rup ndah dăch dêh Việt Nam-Campuchia ta Thủ đô Phnom Penh.

Thủ tướng Phạm Minh Chính an nkao ta Rup ndah dăch dêh Việt Nam-Campuchia.

Tâm bôk nău kan khâl na nê̆ Campuchia, jêh rnôk Thủ tướng Chính phủ Phạm Minh Chính rgum nchră đah Thủ tướng Campuchia; Thủ tướng Phạm Minh Chính mbra tât ôp ngơi kđăch Campuchia Norodom Sihamoni; rgum nchră Kruanh thượng viện Campuchia Say Chhum; rgum nchră Kruanh Quốc hội Campuchia Heng Samrin. Rơh khâl tâm “Năm dăch dêh Việt Nam-Campuchia 2022” rgop hun hao tâm boh uĕh lăng, dăch dêh way ơm, kan ndrel lĕ rngôch, nâp nâl jŏ jông đah 2 dak.