Thủ tướng Chính phủ mhe n’gluh nău njuăl ngăch lôch geh ŭnh sa ƀư 14 nuĭh khĭt ta phường Trung Hòa, quận Cầu Giấy Hà Nội. Thủ tướng tâm pă Groi Thủ tướng Trần Hồng Hà jŭr uănh tât ntŭk ŭnh sa rđău na nê̆ nô nău; đă Ủy ban nhân dân nkual ƀon têh Hà Nội rđău đă ƀư ôp khâl, năn ngăch mpăn nuih n’hâm, drăp ndơ, nuih n’hâm rnăk wâl nuĭh geh khĭt; kan nsum lhăt đah Bộ Công an rđău đă ăp mpôl kan dơi kan rgum nka bah khuch khat.

Bôk mông ôi 24/5, ta rơh hop bah rơh hop tâl 7, Quốc hội, Ủy ban Thường vụ Quốc hội dăn njuăl nău rngot klâng tât rnăk wâl ăp nuĭh khĭt. Groi Kruanh Quốc hội Trần Quang Phương leo mpôl hăn  tât ntŭk ŭnh sa n’hanh nhih dak si ôp khâl, mpăn nuih n’hâm ăp rnăk. Bộ Công an hŏ geh siƀŭt mbơh Thủ tướng Chính phủ mpeh nău ŭnh sa jêng geh tât khuch hô ta nkual ƀon têh Hà Nội. Nkre dăn đă Thủ tướng Chính phủ rđău đă, Thành ủy, UBND nkual ƀon têh Hà Nội ra uănh tay ăp ntŭk jay an manh gŭ n’hanh ăp ntil ntŭk gŭ tâm ban kơt nê ta nkual ƀon têh.