Kêng măng 1/4, ta Nhih pah kan Chính phủ, Thủ tướng Chính phủ Phạm Minh Chính ƀư tơm rơh hop đah ăp n’gâng kan, ăp n’gor, đơn vị mpeh nô nău tĭng ƀư ăp trong rse 500kV mbah 3 gâl bah Quảng Trạch (n’gor Quảng Bình) tât Phố Nối (n’gor Hưng Yên).

Tâm nchră dơi  ƀư tĭng trong pơk sŏng dăng ta bôk ƀoh Nhih pah kan Chính phủ đah 9 n’gor geh trong nchrăp hăn rlău. Ta rơh hop, kruanh rđău kan ăp n’gâng kan, ăp n’gor, đơn vị geh tât mbơh nô nău an ƀư ăp trong nchrăp kan; nkoch ăp jêr jŏt, kŏ kol; dăn đă ăp nău dơn kan, trong nkra gay ăp trong nchrăp kan dơi an ƀư  dơh lơn. N’glôch jêh rơh hop, Thủ tướng Chính phủ Phạm Minh Chính lah rjăp, ăp nhih pah kan, ăp n’gor,  ăp đơn vị kan nsum lhăt n’hanh đah ƀon lan, doanh nghiệp yor nău ŭch nsum, der bah ƀư jêr, leng dăn, sa khâm tâm rnôk  an ƀư trong nchrăp kan, kalơ nuih n’hâm “djăt, nkoch, dâk kan”, “ndrel ƀư, ndrel geh nău dơi n’hanh ndrel geh dŏng”. Ăp n’gor ân ndăn ngăch đă ntrơn du, rong neh an ntŭk ƀư trong rse an nuĭh ndranh ƀư têk rse; ndăn ngăch ntrơn du ntŭk gŭ mhe n’hanh tĭng ƀư  ăp siƀŭt ntrơn du tât ntŭk gŭ mhe an ăp rnăk ƀon lan, đăp mpăn soih aih trong rse gay pơk điện tâm khay 6/2024.