TN2: VOV4.M’nông – Nung nar nđaơ (18/1, tĭng mông ta ntŭk), Thủ tướng Phạm Minh Chính n’hanh I ur ndrel mpôl đại biểu gưl prêh Việt Nam lĕ tât Thủ đô Budapest, ntơm hăn khâl na nê̆ Hungary bah nar 18 tât 20/1/2024 tĭng nău jă bah Thủ tướng Hungary Vitor Orban. Ta rơh khâl aơ, Thủ tướng Chính phủ Phạm Minh Chính mbra geh ăp rơh tâm nchră, rgum ôp đah kruanh gưl prêh Hungary; khâl du đêt ntŭk wăng sa-rêh jêng bah Hungary; râng ăp rƀŭn nchră doanh nghiệp Việt Nam-Hungary; mâp kruanh du đêt rmôt kan dăch dêh n’hanh mâp cán bộ, nuĭh kan Đại sứ quán n’hanh ntoh măt nsum mpôl nuĭh Việt Nam ta Hungary.

Rơh khâl Hungary bah Thủ tướng Chính phủ mbra rgop n’hao lơn tay nsing nơm chính trị, n’hao n’hanh ƀư uĕh tâm boh dăch dêh way ơm, nsrôih ndrel đah Việt Nam đah Hungary; ntrôl n’hanh ndơ̆ ăp nău kan ndrel way ơm du lvang mhe,tâm di nău ŭch hun hao bah ăp dak; ntrôl kan ndrel tâm ăp ntil nău geh, jâng nsan; rhăt jăp tay nău dăch dêh đah nuĭh ƀon lan Việt Nam đah nuĭh ƀon lan Hungary.