Nkhêp di nkah gĭt 94 năm nar ndâk njêng Đoàn Thanh niên Cộng sản Hồ Chí Minh (26/3/1931-26/3/2025), măng 23/3, ta Hà Nội, Thủ tướng Chính phủ Phạm Minh Chính râng Ƀư an ndơ nkhôm nuĭh mom Việt Nam ntoh lư năm 2024, đah bôk nău “Sứ mệnh vinh quang” yor Trung ương Đoàn TNCS Hồ Chí Minh, Prăk nkrem ntop kơl druh ndăm gĭt blău Việt Nam, Đài Truyền hình Việt Nam tâm rgop ƀư. Năm 2024, Mpôl rdâk ƀư an ndơ nkhôm lĕ dơn geh 159 sam ƀŭt rhăch nău đă săch bah 55 ntŭk kan ta lam dak. Mpôl an ndơ nkhôm lĕ joi geh 10 nuĭh mom Việt Nam ntoh lư n’hanh 8 Nuĭh mom Việt Nam mpŏng ŭch geh nău ntoh lư gĭt blău ta ăp ntil nău: Nti nsơm; Mĭn njêng khoa học-mĭn ƀư mhe; Pah kan nkra njêng; tăch rgâl-ndâk njêng nău kan; Mât njrăng bri dak; rnă njrăng đăp mpăn; Thể dục thể thao; Nău kan rêh jêng; Văn hóa nghệ thuật; mât uănh hành chính Ngih dak lĕ dơi moh săk.

Thủ tướng Phạm Minh Chính răm rhơn râng ƀư ntô̆ n’hao gĭt blău bu mom ntoh lư-ăp nuĭh tơm rgŏ năp bah neh dak, đah nău ƀư lah rmôt hăn lor, rmôt bôk năp n’hanh nuih n’hâm “Druh ndăm Việt Nam ntô̆ n’hao, nâp nâl tĭng Đảng” ndơ̆ neh dak nâp lăp rach năm mhe. Thủ tướng mpŏng ŭch Druh ndăm Việt Nam an rgum ƀư tĭng tâm ban, rgâl hao nău rêh jêng, đăp mpăn kon nuĭh, n’hao nău rêh nuĭh ƀon lan, na nê̆ rgâl ăp nău ntrŭnh, nău kơl bah Đảng, Ngih dak mpeh đăp mpăn nău rêh jêng, ngăn lah gĭt tât tâm ban mpeh ntĭm nti, dak si ta ăp nkual neh dak, tât đah tĭng nsum mpôl, ăp rnăk n’hanh tĭng nuĭh, ngăn lah nkual yôk, nkual jru ngai, n’har bri, gôl dak đah nuih n’hâm “mô an nuĭh ntlơi bah kơi”.