VOV4.M'nông: Lah ta rnôk rgum nchră wăng sa tâm boh, hợp tác xã năm 2022 đah nkô̆ "Rgâl mbrô - Suan ntrôl hun hao wăng sa tâm boh, hợp tác xã tâm rach năm mhe nkre đah tĭng ƀư Nghị quyết mbrô 20- NQ/TW" ƀư tâm ôi nar 23/9, Thủ tướng Chính phủ Phạm Minh Chính nkoch kloh, rgâl mbrô lah nău ŭch geh ngăn ngăn bah nău hun hao, wăng sa tâm boh, hợp tác xã mô dơi mô ƀư, mô dơi dâk ŭanh dơm bah dih; jêng he ân rgâl nău mĭn mhe, ntơm bah nău gĭt êng; geh ŭanh jong ngai, nkrum lam; ân ntrôl dŏng âk khoa học công nghệ, công nghệ thông tin, ntrŭt ntrôl rgâl mhe, rgum ăp tơm ndơ, njêng suan ntrôl tĭng nuih n'hâm ban ngăch, hăn ndrel đah ăp nkual wăng sa êng ƀa ƀă.

Rgum nchră ƀư tĭng trong mâp na nê̆ n'hanh pơk sŏng dăng. Ta rơh rgum nchră, ăp đại biểu hŏ tâm nchră, ŭanh năl ăp nău hŏ dơi geh tâm trong rgâl mbrô neh dak lah nsum n'hanh rgâl mbrô tâm nkual wăng sa mpôl, hợp tác xã lah êng; nkre lah ŭanh sŏng ăp nău nchiăng khan, jêr jŏt, ntul rlong n'hanh ăp nkô̆ nău dôl ndơ̆ luh aƀaơ gay geh ăp trong nkra tâm di gay ntrŭt ntrôl rgâl mbrô tâm let năp tay, njêng suan ntrôl an wăng sa mpôl, hợp tác xã hun hao ngăch n'hanh nâp dăng, nkre đah nău ƀư jêng ngăn ngăn Nghị quyết mbrô 20 bah Trung ương.

Nuĭh rblang: Điểu Thân