Kêng măng nar 11/11/2022 ta Phnom Pênh, Campuchia, Thủ tướng Chính phủ Phạm Minh Chính hŏ leo mpôl ntơh măt Việt Nam râng Tâm nchră gưl têh ASEAN đah tĭng băl tâm boh Trung Quốc, Hàn Quốc n'hanh Liên hợp quốc (LHQ).

Ta ăp rơh Tâm nchră, ăp Kruanh rđău kan ASEAN n'hanh ăp dak băl tâm boh uănh năl tay n'hanh n'gluh ăp trong rƀŏng hun hao tâm boh bar ding. Ăp dak băl tâm boh lah rjăp uănh khlay tâm boh đah ASEAN, ton ndrel đah ASEAN ntrŭt ntrôl tay tâm boh dak bah dih, tâm boh n'hanh rdâng lơh geh nău tam đah ăp ntul rlong, rgop tor luh  trong tâm nkual pơk hvi, nkrum lam, kloh rvah, uănh khlay luật pháp dak bah dih, đah ASEAN ƀư rgum tơm khlay.

Ta rơh Tâm nchră gưl têh ASEAN- Trung Quốc tâl 25, Thủ tướng Trung Quốc lah rjăp ASEAN lah trong an ƀư lor trong kan tâm kâng n'har bah he, lah rjăp tay nău khlay ƀư rgum tơm bah ASEAN tâm nău tâm n'guăk ta nkual, ŭch rŏng ndrel ASEAN an ƀư geh nău tam tâm boh têh jong lam lĕ rngôch mhe njêng, ton ntop kơl tay ASEAN rdâk njêng jâng wăng sa nsum n'hanh mât uĕh nău khlay kan ta ăp rơh rgum nchră tâm nkual n'hanh lam ntŭr neh. Lôch jêh tâm nchră, Kruanh rđău kan ăp dak ASEAN n'hanh Trung Quốc ma trong nău mbơh nsum nkah ndray 20 năm nău mbơh mât uănh ăp ding ta dak lêng (DOC) lah rjăp tay nău khlay bah DOC đah nău đăp mpăn, rnă njrăng ta dak lêng, Nău mbơh nsum mpeh nău n'hao dăng hun hao nsum n'hanh nâp dăng, nău mbơh nsum mpeh tâm boh rnă njrăng ndơ sa....

VOV/Nuĭh rblang: Điểu Thân