Bah năp nĕ, kêng măng nar 13/11, jêh ƀư wơt na nê̆, Thủ tướng Chính phủ Phạm Minh Chính lĕ rgum nchră đah Thủ tướng CHLB Đức Olaf Schol. Ta rơh rgum nchră, Thủ tướng Chính phủ Phạm Minh Chính uănh lah rơh khâl bah Thủ tướng Olaf Scholz geh nkô̆ nău dŭt khlay, ndơ̆ tâm boh 2 dak hăn lvang hun hao mhe.

Tâm mông nar nsing nơm n’hanh sŏng dăng rah wah, 2 Thủ tướng lĕ tâm rgâl lĕ rngôch mpeh nu nău hun hao wăng sa-rêh jêng ăp dak, tâm boh kan ndrel ăp ding n’hanh ăp nău nkual, lam ntŭr neh ndrel uănh. 2 hê Thủ tướng lĕ tâm ban ŭch ăp trong nchrŏng, trong mkra têh gay ntrôl dăng lĕ rngôch kan ndrel đah 2 dak. 2 ding lĕ tâm ban ŭch n’hao tâm rgâl ăp gưl, ngăn lah gưl prêh, lĕ rngôch ăp trong Đảng, Ngih dak, Chính phủ, Quốc hội, mbơh ƀư săk rnglăy ăp trong ƀư kan ndrel ăp ding. Mpeh wăng sa-tăch rgâl, 2 nuĭh kruanh ntrŭt nsôr ăp ngih pah kan, doanh nghiệp 2 dak mbơh ƀư tŏng ăp, săk rnglăy Tâm ton tăch rgâl dah rŏng Việt Nam-EU (EVFTA).