Kêng măng 24/6 ta nkuăl ƀon têh Đại Liên, n’gor Liêu Ninh, Trung Quốc, Thủ tướng Chính phủ Phạm Minh Chính hŏ geh rơh tâm nchră ma Thủ tướng Quốc vụ viện dak Trung Quốc Lý Cường di rnôk râng rƀŭn nchră ăp năm ăp nŭih leo trong tal 15 bah nau tâm nchră văng sa lam ntur neh tâm Đại Liên (rơh rƀŭn WEF Đại Liên) ndrel pah kan ta Trung Quốc. Tâm rnôk tâm nchră, bar Thủ tướng tâm ban nau ntrŭt dăng nau ntrŭnh ƀư ân săk tam nau ton lah nsum Việt Nam-Trung Quốc mpeh nau ƀư jru nâp ndrel n’hao tay nau tâm boh kan nsum ăp ntil, ndâk nsum mpôl tâm nkoch mbơh nau jêh aơ Việt Nam-Trung Quốc geh nau khlay kan tĭng ntrong “6 rlau”;

Mât nau tâm boh, tâm mâp gưl prêh ndrel ăp gưl, ntrŭt dăng nau tâm n’ur, tâm boh trong Đảng, đah bar Chính phủ, Quốc hội/Nhân đại, Mặt trận Tổ quốc/Chính hiệp bar dak; pơk hvi nau tâm boh tâm ăp nau kan tơm kơt nchră nau, neh dak, rnă njrăng; n’hao nau tâm boh ngăn râm ăp nau kan ndrel tâm n’ur đah ăp n’gor ndrel ăp rmôt ƀon lan; ndâk trong n’har bri klơ neh kơh đăp mpăn, tâm boh ndrel hun hao; nkân ueh nau tâm rkeh, mât nau đăp mpăn, rnă njrăng tâm dak lêng; n’hao lơn nau tâm boh tâm ăp nau tâm nchră lam ntur neh, nkuăl./.