Kêng măng 10/5, di nkah gĭt 65 năm nar pơk trong Hồ Chí Minh-Nar Way ơm Tahen Trường Sơn, Thủ tướng Chính phủ Phạm Minh Chính tât khâl Binh đoàn 12-Tổng Công ty ndâk njêng Trường Sơn n’hanh Rmôt kan way ơm Trường Sơn-Trong Hồ Chí Minh Việt Nam. Jêh Hiệp định Giơ-nê-vơ (7/1954), neh dak ntơm geh tâm nkhah, Bộ Chính trị ntrŭnh an ndâk njêng Mpôl pah kan Tahen đah âk nău kơl pơk trong ntop kan nău kan đah nkual Bắc n’hanh miền Nam.

Lơ 19/5/1959 lah bôk nău khlay bah nău pơk trong Trường Sơn-trong Hồ Chí Minh n’hanh dơi săch lah Nar way ơm bah Tahen Trường Sợn janh dăng. Gay ƀư jêng Trường Sơn janh dăng, hang rmưn cán bộ, tahen, druh ndăm xung phong, dân công hỏa tuyến lĕ nsơr lôch săk soan, tâm nĕ rlău  2 rmưn cán bộ, tahen, druh ndăm xung phong lĕ roh, bơi 3 rmưn tahen sôt rmanh, hang rmưn nuĭh geh khih dak si deoxin.

Ntoh ngơi ta aơ, Thủ tướng Phạm Minh Chính djôt dơn n’hanh nkoch nuih n’hâm nkah gĭt ăp nuĭh roh, nsơr soan, rgop têh bah ăp Tahen Trường Sơn.

Thủ tướng an gĭt, jêh rnôk neh dak kơp dơn ngoăy, Tahen Trường Sơn dơi rgâl an pah kan ndâk njêng wăng sa, mkra tay nău khuch tâm lơh tâm su. Binh đoàn 12 dơi ndâk njêng tĭng nău ndơn tay rmôt Tahen Trường Sơn. Thủ tướng dŭt rhơn ta năp nău hun hao bah Binh đoàn 12-Tổng Công ty Ndâk njêng Trường Sơn n’ăp rup ndah, têh hvi, săk rnglăy ƀư tĭng nău kan chính trị; mĭn lah tay jâng nsan, nsing nơm, nău moh êng Trường Sơn, rgop an nău hun hao bah neh dak.