Kêng măng nar 10/4, ta Nhih pah kan Chính phủ, Thủ tướng Chính phủ Phạm Minh Chính hŏ wơt Bộ trưởng Ngoại giao Cộng hòa liên bang Brazil Mauro Vieira (Mau-rô Vi-ê-ra) dôl khâl ngăn Việt Nam ntơm bah nar 09-10/4/2024.

Ta rơh wơt, Thủ tướng Chính phủ Phạm Minh Chính rhơn rnê hăn khâl tâl bar bah Bộ trưởng Ngoại giao Brazil tât Việt Nam n’hanh nkoch ăp nău nkah uĕh mpeh neh dak n’hanh kon nuĭh Brazil tâm rnôk hăn khâl tâm khay 9/2023 mhe aơ; rnê âk ăp trong kan bah Chính phủ Tổng thống Lula da Silva gay rdâk n’hanh n’hao têh wăng sa, chính trị, nău khlay kan bah Brazil ta nkual n’hanh lam ntŭr neh n’hanh nsing nơm an lah hăn khâl bah Bộ trưởng Ngoại giao Mauro Vieira mbra rgop ƀư n’hao dăng lơn tâm boh lam lĕ rngôch Việt Nam – Brazil; lah njuat hăn na nê̆ gay an ƀư ăp nău tâm ton bah kruanh rđău kan gưl têh bar dak tâm bah ri aơ, lơn lah ăp trong kan ma bar dak săk geh âk n’hanh nău ŭch dŏng, yor nău geh bah ƀon lan bar dak, yorr đăp mpăn, tâm boh n’hanh hun hao ta bar nkual n’hanh lam ntŭr neh.

 Bộ trưởng Mauro Vieira hŏ mbơh đah Thủ tướng Chính phủ mpeh ăp nkô̆  tâm nchră đah Bộ trưởng Ngoại giao Bùi Thanh Sơn; an gĭt bar ding dăn đă ăp trong nkra na nê̆ n’hanh tâm ban ŭch bôk nău kan tâm boh bar ding Việt Nam – Brazil let năp tay, lơn lah tâm ăp trong kan bar ding ndrel săk geh  n’hanh uănh khlay kơt tuch tăm, khoa học công nghệ, rgâl ŭnh nar, ŭnh nar sinh học…