Ôi 18/11, ta Ninh Bình, Thủ tướng Chính phủ Phạm Minh Chính hŏ rgŏ jă nau kan tâm rlong “Ntrŭt dăng nau hun hao ntŭk ntu tâm ban, ueh mhe; ƀư nau kan têm nkrem, rdâng nau mpŭng lir”. Thủ tướng Chính phủ hŏ mbơh jru rjăp, nkô̆ nau bah nau kan hun hao ntŭk ntu gung trong ndrel ƀư nau kan têm nkrem njrăng nau mpŭng lir.

Thủ tướng đă lŏ n’hao nau gĭt, nau blau mpeh nau ƀư têm nkre, njrăng mpŭng lir đah nau kan njrăng, rdâng mpŭng lir, nau mô ƀư tâm di tĭng nuih n’hâm rđau đă bah Tổng Bí thư Nguyễn Phú Trọng; đă ăp gưl, ăp ntŭk kan, nkuăl, ntŭk kan, rmôt kan, ƀon lan ndrel ntŭk ƀư nau kan tăch rgâl rgum tâm rlong ƀư ueh du đê̆ nau kan ma nau tơm lah njêng luh nau tâm rlong khuh n’gor tâm nau hun hao ndâk njêng, hun hao ntŭk ntu ngăch, nâp, đă ăp n’gâng kan, ntŭk kan, n’gâng kan hun hao prêh ngăn nau kan leo trong, janh mĭn, janh kan, janh ndơn nau ma nơm ƀư tĭng nau dơi geh nsum./.