Tĭng nău mbơh tơih ta rơh rƀŭn nchră, ta rơh mih sial dak buk mhe nơh, rnoh jay rlâm geh ƀư mhe lah 1.597 jay tât aƀaơ lĕ ƀư lôch 671 ngih jay, rnoh hôm e dôl geh ƀư tay. Rnoh ngih jay geh khuch khat bơi tât 34.800 ngih jay, aƀaơ lĕ geh ƀư lôch nkra mhe. Nuĭh leo kan n’gor Đăk Lăk an gĭt tâm ba năp tay mbra geh uănh nđôi tay, ƀư tay ngih jay ta ntŭk gŭ ƀon lan gay ma njrăng rdâng dak buk. N’gor Gia Lai dôl rgum ƀư tay ngih jay 38 nkual gŭ mhe an ƀon lan, ntrơn lĕ rngôch nuĭh ƀon lan tâm nkual geh nău khuch tât ntŭk gŭ mhe an đăp mpăn lơn. N’gâng kan mât rnă njrăng ngih dak lĕ geh rgum lĕ nuĭh kan, ndơ dŏng, ndơ̆ tât 176 rbăn cán bộ, tahen, ƀon lan mât kan êng đah rbăn ndeh klư ndơ kan ăp ntil tâm rgop đah n’gâng kan ta ntŭk kơl an ƀon lan rdâk ƀư, nkra tay ngih jay. N’gâng kan Công an lĕ rgum geh rlău 11 rbăn cán bộ, tahen kơl an nuĭh ƀon lan ndâk nsơm nău tât tă phŭt sial. Ta rơh rƀŭn nchră, Thủ tướng Phạm Minh Chính mpơl nău rhơn rnôk Nău kan Quang Trung lôch 1 khay rgŏ jă lĕ ƀư lôch lĕ rngôch 100% ngih jay geh nkra mhe, di đah nău ngluh mpŏng mbơh. Thủ tướng đă rhoăt gleh mông nar, nsrôih tât lơ 15/1/2026 an geh ƀư lôch rdâk ƀư tay ngih jay rlâm, chôt gay ma ƀon lan geh jay gŭ ta năp Đại hôị đại biêủ lam dak tal 14 bâh Đảng.