Tâm kêng măng 13/11, ta Ngih Chính phủ, Thủ tướng Phạm Minh Chính ƀư tơm Rƀŭn nchră trực tuyến mkra khuch khat trôk nar lơh, mkra nkra njêng, tăch rgâl n’hanh đăp mpăn nău rêh nuĭh ƀon lan ta nkual miền Trung. Thủ tướng đă ăp ntŭk ngăch nkra tay n’gâng trong điện, dak kloh uĕh, ntung trong, viễn thông. Kơp uănh tay, rgŏ jă ăp ndeh rklư wơt kơl an ăp rnăk ƀon lan geh ji ngot, trơn nuĭh ƀon lan tât ntŭk đăp mpăn; tŏng ăp nău pă phe dơi ƀư dâl tâm lơ 14/11; nkre kuăl jă ăp doanh nghiệp, nuĭh lŏng bôk tôr đah “nău rŏng rnoi nuĭh, tâm kơl ƀon lan” kơl nuĭh ƀon lan rlet rlău jêr jŏt.

Ta năp nĕ, tâm rơh pah kan ta n’gor Gia Lai, nung nar 13/11, Thủ tướng Phạm Minh Chính lĕ tât khâl, pah kan đah Tahen n’har bri n’gor Gia Lai, ƀư tơm rơh rƀŭn đah ăp n’gâng kan, nău kan, kruanh tơm n’gor Gia Lai mpeh trong kan mkra khuch khat phŭt mrô 13. Thủ tướng đă n’gor an dâl rnoh prăk 60 rmen gay ƀư ntŭk gŭ mhe tâm nău ndăn, đăp mpăn kônh wa geh ntŭk gŭ mhe. Lah rjăp nău kan jăch ndăn an mkra nkra njêng, tăch rgâl, Thủ tướng đă ăp rmôt dŭt n’hâm lăp ntop kơl răk rao, nkra gay geh neh an tuch tăm. Trong ngân hàng an njong, ndruch rnon, geh ndơ an manh gay doanh nghiệp mkra khuch khat dak lip; nchoeng rwêl tay prăk soăy, prăk dŏng; ngăch mkra jêh ăp ngih samƀŭt n’hanh ngih dak si. N’gor Gia Lai lĕ kơp êng khuch khlat nklăp 5.900 rmen prăk, Thủ tướng đă N’gâng kan prăk kaih an tâm pă nu nău nsum gay geh ntop kơl tâm di, ngăch.