Kêng măng (24/12), ta Nhih pah kan Chính phủ, Thủ tướng Phạm Minh Chính ƀư tơm rơh pah kan đah Bộ Quốc phòng n’hanh ăp n’gâng kan, ăp n’gor gay an ƀư nău dơn kan tahen, njrăng n’gang neh dak năm 2026. Thủ tướng rnê âk Bộ Quốc phòng hŏ ƀư wat jêh ngăch prăl nău dơn kan năm 2025, hun hao công nghiệp quốc phòng, rnă năp ndrak nsiu, ndơ dŏng tâm lơh, năp blău kỹ thuật an ăp quân binh chủng tĭng trong rƀŏng têh dăng mhe.

Tâm let năp tay, Thủ tướng Chính phủ đă Bộ Quốc phòng đăm jru tay, tĭng ƀư jăp, geh nău tam ăp nău rđău đă bah Đảng, rgum tơm lah tĭng ƀư an dŭt jăp "2 trong rôih sŏng, 2 ntrôl dăng, 2 njrăng n’gang", "5 nâp dăng"; lor nchrăp rgâl mhe, gŭ mĭn, ƀư njêng ndrak nsiu rnă năp têh dăng mhe, tĭng ƀư geh nău dơi nău dơn kan 2026. Lam tahen rgum tĭng ƀư nău dơn kan rgum tơm rdâk njêng Mpôl tahen chŏl dăng, glo tơm, đăng hăr, têh dăng mhe; an ƀư ngăch ngăr, ngăn ngăn, geh nău tam ăp nău kan tâm boh dak bah dih njrăng n’gang neh dak; ntik n’hao trong rƀŏng ƀư tơm, nsrôih ndôr êng tĭng ƀư ăp nău dơn kan công nghiệp quốc phòng, pah kan ndrăp ndơ, kỹ thuật.