Rơh rƀŭn nchră gay ma ƀư na nê̆ tĭng Nghị quyết 23 bâh n’gâng kan chính trị mpeh hun hao Tây Nguyên; tâm nĕ rgum ta 3 nkô̆ nău tơm: Pla n’hơ, mbơh tơih nău kan rup, nkual neh văn hóa, kon nuĭh n’hanh mbơh tơih ndơ tuch tăm ta nkual. Nău mbơh tơih bôk nău kan bâh chính phủ ƀư tĭng Nghị quyết 23 bâh n’gâng kan chính trị. mbơh tơih nkual Tây Nguyên. Ta rơh rƀŭn nchră, ăp đại biểu lĕ geh âk nău tâm nchră na nê̆, tâm di, dơn kan, nsrôih n’hanh dăn đă mbơh tơih âk ntrong kan an tâm di, na nê̆, bâh nĕ mpơl nău nsrôih, tâm ban âk gay ma ntrôl an hun hao ngăch, nâp nâl  ta Tây Nguyên, ntop ndơ̆ Nghị quyết mbrô 23 bâh n’gâng kan chính trị lăp tâm nău rêh jêng.

Lôch geh djăt nău tâm rgop, ntoh ngơi ta rơh rƀŭn nchră, Thủ tướng chính phủ Phạm Minh Chính lĕ mbơh rblang âk nău dơi, nău nkhêp ntoh lư, nău dơi tâm rlong n’hanh ăp nău kŏ khan mô dơi ta nkual Tây Nguyên. Nkre lah nchŏng đă na nê̆ nău mpŏng kan, nău kan tơm ƀư tĭng bôk nău pah kan bâh chính phủ, bâh nău nĕ ngluh mbơh du đê̆ nău mpŏng kan na nê̆ kơt lah nău hun hao GRDP râng geh klâp ma 7-7,5%. Tât năm 2030, GRDP râng geh du hê nuĭh geh klâp ma 130 rkeh prăk, tâm ban đah 5 rbăn đôlar. Rnoh nkuăl ƀon têh geh klâp ma 37,2-40,7% rnoh xã geh tâm di nkual ƀon lan mhe klâp ma 85%.

Ta năp nĕ, Thủ tướng Chính phủ Phạm Minh Chính n’hanh mpôl pah kan bâh Chính phủ tât khâl Công ty TNHH Dalat Hasfarm way nkra njêng, pă ntil tơm, kao koh n’gĭng n’hanh kao ta gri ta nkuăl ƀon têh Đà Lạt.

Lôch bơi tât 30 năm njêng, bâh du ha kao hồng n’hanh du ha cẩm chướng geh tăm tâm nkual ngih bil geh ƀư ma nkar bôk năp, aƀaơ Dalat Hasfarm lĕ rgâl jêng ƀư ngih bil lĕ rngôch đah loih n’hanh pơk tay ăp ntŭk tăm đah rnoh neh bơi tât 320ha, aƀaơ geh bơi tât 4 rbăn nuĭh pah kan mbro. ăp năm Dalat Hasfarm pă an ntŭk tăch rgâl 15 ngih dak n’hanh nkual neh, dŭt âk lah Nhật Bản, đah lĕ rnoh khlăy bơi tât 60 rkeh đôlar. Ta aơ, Thủ tướng dăn đă Dalat Hasfarm pơk hvi tay ntuh kơl ƀư hvi nău kan ăp nkual ƀon têh, geh mât kơl, mât chăm nău rêh, nău mĭn an nuĭh pah kan, ntop ndrel ta ntŭk ƀư ueh nău kan rnă njrăng rêh jêng.