Ôi 22/1 (tĭng mông ta ntŭk), ta Cung điện Victoria (Nhih pah kan Thủ tướng) ta thủ đô Bucharest, Thủ tướng Ion-Marcel Ciolacu hŏ ƀư tơm rơh wơt Thủ tướng Chính phủ Phạm Minh Chính n’hanh mpôl ntơh măt gưl têh Việt Nam khâl ngăn Romania. Ta rơh tâm nchră, bar kruanh rđău kan tâm ban ŭch nsing ta bơi 75 năm tâm boh tâm rnglăp way ơm krêp dêh, bar dak ân tâm boh lhăt lơn tâm ăp trong kan, gay ntrôl dăng tay tâm boh tâm rnglăp way ơm bar dak hao prêh mhe tâm let năp  tay.

Mpeh tâm boh wăng sa- tăch rgâl- ntuh kơl, bar Thủ tướng lah rjăp aơ lah n’gâng tơm khlay tâm boh bar ding; tâm ban ŭch ntrôl dăng tâm boh tăch rgâl- ntuh kơl tâm di đah nău tâm boh chính trị, ntik n’hao lơn  đŏng ăp nău way tâm boh ơm geh. Thủ tướng Phạm Minh Chính lah rjăp Việt Nam mbra ƀư  mpông rlong gay ăp ndơ tăch bah Rumani tât tăch ta Việt Nam n’hanh ASEAN. Bar ding tâm ban ŭch ntrôl dăng tâm boh geh nău tam  tâm ăp trong kan way ơm kơt ntĭm nti, khoa học-công nghệ, rnă njrăng – njrăng n’gang neh dak, văn hóa - thể thao – pâl nđaih, nuĭh kan, dak si- dak gle  nkre ntrŭt ntrôl pơk hvi tâm boh ta ăp trong kan mhe kơt công nghệ thông tin, rgâl mhe, rgâl mbrô, rgâl kloh uĕh, wăng sa wăch sĭt tay…

Lôch tâm nchră, bar Thủ tướng hŏ uănh saơ Lễ ký ton 19 siƀŭt tâm boh đah ăp n’gâng kan, ăp n’gor bar dak tâm ăp trong kan wăng sa, văn hoá, nuĭh kan n’hanh ntĭm nti./.