Tĭng nău mbơh bâh kruanh n’gâng kan nchră nău đah dak bah dih, 6 khay bôk năm 2024, nău kan nchră nău wăng sa lĕ geh mbơh tơih na nê̆ n’hanh săk rnglăy, ntop ngăn ngên ta nău hun hao wăng sa- rêh jêng.

Tâm 36 nău pah kan nchră nău đah dak bah dih gâl têh bâh bôk năm tât aƀaơ, nkô̆ nău wăng sa hun hao tay jêng nău kan tơm, nsĭt tay ăp nău geh săk rnglăy na nê̆, ngăn ngên, ký tâm ton geh âk nău kan, nău tâm ton tâm kơl kan đah ăp dak. Thủ tướng an gĭt, aƀaơ Việt Nam uănh năl an lor gay ma hun hao yor nĕ an geh rgum ƀư mhe ăp nău pah kan an hun hao nău way ơm geh ndơ dŏng, ntuh kơl n’hanh tăch an dak bah dih, đă ăp ntŭk kan ndơn kan Việt Nam ta dak bah dih an geh rgum ta nău kan tăch ndơ an dak bah dih. Ŭch kơt nĕ an geh ntrôl nău ntŭk tăch rgâl, rgâl mhe ntŭk tâm kơl, ntrôl an hun hao tâm kơl wăng sa, tăch rgâl, ntuh kơl, tâm nđur ƀon lan, ntrôl nău pâl nđaih, rgum kuăl đă ntuh kơl, pơk hvi hun hao an ăp nău kan hun hao mhe.