Ôi 4/3, Thủ tướng Chính phủ Phạm Minh Chính n’hanh I ur ndrel mpôl đại biểu gưl têh Việt Nam hăn râng tâm nchră gưl têh mha êng nkah ndray 50 năm tâm boh ASEAN – Australia, khâl ngăn Australia n’hanh khâl ngăn New Zealand ntơm bah nar 05-11/3/2024.

 Tâm nchră gưl têh mha êng ƀư ntơm bah nar 4-6/3 lah jâng tơm khlay tâm lịch sử nsum bah Australia đah nkual. Jâng ntơm mpơl nău ton bah Australia tâm nău n’hao dăng tâm boh đah nkual Đông Nam Á. Nkô̆ rgum tơm bah tâm nchră gưl têh mha êng rơh dja lah nkah ndray 50 năm tâm boh  tâm dâl nău Australia - ASEAN. Tâm nchră gưl têh mha êng rgum tâm puăn trong kan n’gâng tơm: Tăch rgâl, kruanh mhe ntoh, duh nđik n’hâm sial n’hanh ŭnh nar kloh uĕh, n’hanh tâm boh nchuăn rdeng dak lêng. Ăp nău kan na nê̆ lah: Rgum nchră CEO Doanh nghiệp rgum ăp kruanh rđău kan doanh nghiệp bah Australia n’hanh Đông Nam Á; Tâm nchră ăp doanh nghiệp jê̆ n’hanh dah găp (SME); rgum nchră duh nđik n’hâm sial n’hanh ŭnh nar kloh uĕh; tâm nchră tâm boh nchuăn rdeng dak  lêng.

Hăn khâl ngăn Australia n’hanh New Zealand bah Thủ tướng Phạm Minh Chính n’hanh I ur ndrel mpôl đại biểu gưl têh Việt Nam, mbra njêng suan ntrôl dăng jru hvi lơn đŏng tâm boh đah Australia n’hanh New Zealand n’hanh gay an ƀư tay gung trong tâm boh dak bah dih sŏng di ma Đại hội Đảng tâl XIII hŏ n’gluh./.