Thủ tướng Phạm Minh Chính ndrel I ur n’hanh mpôl đại biểu gưl prêh Việt Nam lĕ sĭt bah Romania, lôch uĕh rơh pah kan râng Rƀŭn nchră WEF Davos, khâl na nê̆ Hungary n’hanh Romania. Tâm 2 nar pah kan na nao đah mông nar âk đah rlău 30 nău ƀư, rơh pah kan bah Thủ tướng Chính phủ Phạm Minh Chính râng Rƀŭn nchră WEF Davos rơh tal 54 lĕ lôch uĕh ta âk ntil, geh rnoh âk lĕ rngôch nău rƀŏng, đă nău kan n’gluh an, gay n’glơi uĕh n’hanh rêng hvi têh dăng rup ndah bah du dak Việt Nam đah nău ŭch, nău geh, jâng nsan n’hanh nsing nơm mhe. Ăp nău ntoh ngơi bah Thủ tướng Chính phủ lĕ nkoch ăp nău mbơh na nê̆ mpeh neh dak Việt Nam hun hao ngăch, rgâl mhe, lah ntŭk tât uĕh an ăp tập đoàn lam ntŭr neh.

Rơh khâl na nê̆ Hungary n’hanh Romania jêh rnôk râng WEF Davos bah Thủ tướng Chính phủ Phạm Minh Chính lĕ lôch uĕh. Tâm rnôk khâl, Thủ tướng Phạm Minh Chính lĕ geh rlău 30 rơh mâp, tâm nchră đah lĕ rngôch kruanh gưl prêh bah Ngih dak, Chính phủ, Quốc hội, đảng chính trị 2 dak, ntoh ngơi nău kơl ta ăp ngih sam ƀŭt đại học, râng rƀŭn nchră doanh nghiệp, mâp rmôt kan dăch dêh 2 dak đah Việt Nam, mâp nsum mpôl kônh wa nuĭh Việt n’hanh khâl du đêt ntŭk wăng sa, khoa học kỹ thuật.