Ôi aơ 14/11, Bộ Kế hoạch đầu tư ƀư rơh hop báo mbơh mpeh Tâm nchră an ƀư Nghị quyết mbrô 23-NQ/TW bah Bộ Chính trị mpeh trong rƀŏng hun hao wăng sa- rêh jêng kon nuĭh, mât đăp mpăn njrăng n'gang neh dak, rnă njrăng nkual Tây Nguyên tât năm 2030 mbra dơi ƀư ta nkual ƀon têh Đà Lạt, n'gor Lâm Đồng.

Tĭng nê, tâm nchră mbra ƀư tâm nar 20-11-2022, ta nâm nău ƀư tơm bah Thủ tướng Chính phủ Phạm Minh Chính. Đah nkô̆ “Hun hao nđĭr – tâm ban – Jŏ jong", aơ lah tâm nchră "3 tâm 1", dơi ƀư đah nău ŭch mbơh bôk nău kan bah Chính phủ tĭng ƀư Nghị quyết mbrô 23 mpeh trong rƀŏng hun hao wăng sa- rêh jêng kon nuĭh n'hanh đăp mpăn njrăng n'gang neh dak, rnă njrăng nkual Tây Nguyên tât năm 2030, uănh ngai tât năm 2045. Nkre ntrŭt ntrôl ngăch ntuh kơl, kuăl jă nău uănh khlay bah ăp nuĭh ntuh kơl, hiệp hội doanh nghiệp tâm dak, dak bah dih, ăp băl tâm boh hun hao tâm nău ndrel hăn đah Chính phủ tâm trong an ƀư ăp bôk nău kan, trong nchrăp ntuh kơl geh nkô̆ khlay đah hun hao wăng sa- rêh jêng kon nuĭh nkual Tây Nguyên.   

VOV/Nuĭh rblang: Điểu Thân