Ôi ntri (17/4), Thủ tướng Chính phủ Phạm Minh Chính mâp măt, nkah gĭt ăp  tahen Điện Biên, n’hanh druh ndăm xung phong, dân công hỏa tuyến râng na nê̆  tâm  lơh Điện Biên Phủ nkhêp nkah ndray 70 năm lơh dơi Điện Biên Phủ (7/5/1954 - 7/5/2024).

Lah ta rơh mâp măt, Thủ tướng Phạm Minh Chính hŏ njuăl nău ôp khâl, dăn an n’hâm suan, nău mbah rhơn dŭt uĕh lăng bah Tổng Bí thư Nguyễn Phú Trọng tât ăp wa, ăp kônh, ăp yơ, ăp yuh nô tahen Điện Biên, druh ndăm xung phong, dân công hỏa tuyến, ƀon lan ăp rnoi mpôl đê̆ n’gor Điện Biên hŏ rgop khlay ƀư jêng geh nău dơi Điện Biên Phủ "n’gloh lư lam ntŭr neh, ngâr lam bri”. Thủ tướng an gĭt, ăp năm rlău aơ, đah nău way “Ngêt dak kah gĭt tu tơm, sa play nkah gĭt nuĭh tăm", Đảng, Ngih dak he êng way uănh khlay n’hanh rđău đă ƀư  jăp  pah kan nkah gĭt sĭt n’glĭng đah nuih n’hâm  dơn kan, nuih n’hâm  uănh khlay n’hanh nău nkah gĭt jru; hŏ n’gluh an dŏng n’hanh an tĭng ƀư geh nău tam âk trong nchrăp, trong ntop kơl na nê̆, ngăn ngăn đah tahen ơm rmanh, tahen kop ji, rnăk tahen ơm khĭt, ăp nuĭh geh n’hâm suan đah cách mạng, uănh aơ lah nău dơn kan chính trị khlay, way ƀư mbro n’hanh tâm rŏng, dơn kan. Let năp tay, Thủ tướng dăn đă ăp gưl, ăp n’gâng kan,  ăp n’gor tĭng ƀư jăp tay trong nchrăp bah Đảng, trong kơl, pháp luật bah Ngih dak, ntrôl dăng lơn đŏng pah kan mât chăm tahen ơm rmanh, tahen ơm kop ji, rnăk wâl tahen ơm khĭt, nuĭh geh n’hâm suan đah cách mạng.