Ôi 5/3, tĭng mông ta ntŭk, Thủ tướng Phạm Minh Chính râng rƀŭn nchră Doanh nghiệp Việt Nam-Australia.

Rƀŭn nchră dơi ƀư ta Đại học RMIT, nkual ƀon têh Melbourne, bang Victyoria, yor N’gâng kan Kế hoạch n’hanh Đầu tư n’hanh Đại sứ quán Việt Nam ta Australia tâm rgop đah Ngih pah kan Tăch rgâl n’hanh ntuh kơl Australia, Đại sứ quán Australia ta Việt Nam ƀư đah tât râng bah âk nsum mpôl doanh nghiệp 2 dak. Ta aơ, ăp đại biểu dơi nkoch mpeh nău geh, ntŭk ntô ntuh kơl, tăch rgâl bah ăp doanh nghiệp 2 dak Uănh lah mpeh nău geh hun hao bah ntŭk ntô prăk kaih ta Việt Nam; Uănh lah mpeh kan ndrel ntuh kơl tâm nău kan lŏ mir công nghệ mhe bah doanh nghiệp Việt Nam ta Australia.

Lơn lah, Rƀŭn nchră an mông nar gay ăp doanh nghiệp an nău ôp n’hanh dơi kruanh ăp n’gâng kan, nău kan 2 dak ơh rblang ăp nău geh tât kơt: Trong kan têh hun hao wăng sa bah ăp dak; ăp nău kan kơl lor; trong kơl; săm ƀŭt, ngih wâl, nuĭh kan... Ndrel đah nĕ, doanh nghiệp 2 ding tâm nchră ndrel, boăt nthoi kan ndrel ntuh kơl, tăch rgâl.

Ntoh ngơi ta rƀŭn, Thủ tướng đă kan ndrel, 2 ding rgum ntrôl ăp ndơ hao jêng way ơm kơt ntuh kơl, tăch n’gluh, dŏng ndơ, rgâl mrô, rgâl uĕh nđĭr. Nuĭh djôt bôk Chính phủ mpŏng 2 ding ntrôl dăng tay tâm nđŭr nuĭh ƀon lan, pâl nđaih, văn hóa n’hanh ntĭm nti tĭng mât dăng nău uĕh n’hanh nău way ơm bah 2 rnoi nuĭh.