Ta rgum nchră “N’hao rnoh yach pah kan gưl neh dak năm 2024” tă bah Tổng Liên đoàn Lao động Việt Nam ƀư, Thủ tướng đă ăp bộ, ăp nhih pah kan, ăp n’gor rgum ăp tŏng ăp nău dăn đă đoàn viên, nuĭh kan gay lôch jêh ăp tŏng trong kơl. Rgum nchră lah rnôk gay công đoàn, đoàn viên, công chức, viên chức, công nhân nuĭh kan ntik nău khlay kan n’hanh nău  dơn  kan bah he tâm nău dăn đă ăp trong nkra ntrŭt ntrôl n’hao rnoh yach pah kan gưl neh dak, rgop hun hao neh dak, nău  rêh rhơn răm.

 Lôch rnôk djăt ăp nău rgop ta rnôk tâm nchră Thủ tướng Phạm Minh Chính hŏ tâm nđŭr đah ăp yuh nô công nhân, viên chức, nuĭh kan, cán bộ Công đoàn. Thủ tướng đă lĕ rngôch yuh nô công nhân, nuĭh kan ntik n’hao  tay lơn đŏng nău khlay kan bah nuĭh kan- nuĭh tơm râng na nê̆ tâm rnôk ƀư njêng, njêng luh drăp ndơ n’hanh nuih n’hâm an lam rêh jêng kon nuĭh. Mô rlu tâm ôp, tâm  kơt nti êng gay n’hao nău  gĭt blău, nău hăr ngăch ti  kan, nău ơm gĭt kan, nău dơi bên di; N’hao nuih n’hâm dơn kan, ngăch ngăr njêng mhe, n’hao rnoh ngăch yach kan, săk blău kan, geh nău dơi tam pah kan.