Ôi 23/4, ta Hà Nội, Thủ tướng Phạm Minh Chính râng n’hanh lah ta rơh ntơm pơk rgum nchră nău rêh let năp tay ASEAN – nău kan khlay dơi ƀư tĭng nău mĭn bah Thủ tướng.  Bơi 500 nuĭh ntơh măt râng rơh hop, đah ntoh măt bah Thủ tướng Chính phủ dak Cộng hoà Dân chủ Nhân dân Lào – Kruanh ASEAN 2024; wa Kao Kim Hourn, Tổng Thư ký ASEAN; ăp bộ trưởng, đại sứ, ntơh măt Chính phủ ăp dak ASEAN, ăp dak tâm boh tâm dâl nău, ăp mpôl kan dak bah dih.

Rgum nchră let năp tay ASEAN 2024 đah nkô̆ “Rdâk njêng jâng wăng sa ASEAN hun hao ngăch, nâp  dăng, sŏk kon nuĭh ƀư rgum tơm” lah du nău ƀư mhe khlay tă bah Thủ tướng Phạm Minh Chính dăn đă ta tâm nchră gưl têh ASEAN tâl 43 tâm khay 9/2023. Aơ lah nău mĭn mhe bah Việt Nam đah nău ŭch rŏng njêng rgum nchră nsum an ăp dak  lăp kan nsum ASEAN tâm ban kơt ăp băl mpôl tâm boh bah ASEAN, nuĭh  ƀon lan ASEAN ndrel rgop tâm nău ntrŭt ntrôl, tor saơ trong hun hao an let năp tay bah ASEAN. Lah ta rnôk rgum nchră, Thủ tướng Phạm Minh Chính lah rjăp, gay tĭng ƀư jêng ngăn ngăn trong uănh jong ASEAN 2045, ân tĭng ƀư 5 n’hao dăng n’hanh Việt Nam mbra nsrôih lơn đŏng gay nsum ti nchih tay ăp nău nkoch nău dơi, pơk luh trong  hăn let năp tay tâm  ban ŭch dơn ngoăy âk ntil bah ASEAN.