Kêng măng 22/7, Thủ tướng Chính phủ Phạm Minh Chính ƀư tơm rơh hop đah ăp n’gâng kan n’hanh ăp n’gor mpeh nô nău an ƀư trong rse điện 500 kV mbah 3. Trong rse 500kV mbah 3 lah gâl nthoi bah Phố Nối, Hưng Yên tât Quảng Trạch, Quảng Bình, gâl hăn rlău ăp n’gor Thanh Hóa, Nghệ An, Hà Tĩnh. Aơ lah rơh hop tâl 4 tă bah Thủ tướng Chính phủ ƀư tơm,  ôp uănh, ntrŭt ntrôl n’hanh rgŏ jă an ƀư tâm 6 khay aơ.

N’glôch jêh rơh hop, Thủ tướng Chính phủ Phạm Minh Chính lah rjăp trong rse 500 kV mbah 3 lah trong nchrăp kan rgum tơm geh nkô̆ dŭt khlay tât hun hao wăng sa- rêh jêng kon nuĭh, rnă njrăng, njrăng n’gang neh dak bah neh dak n’hanh đăp mpăn lam rêh jêng kon nuĭh ăp nkual trong rse hăn rlău. Thủ tướng Chính phủ đă ăp nuĭh tơm ƀư ntrŭt ntrôl ndăn ngăch lơn đŏng, đăp mpăn nâp uĕh, mô an mâp rmanh pah kan. Thủ tướng đă ăp n’gâng kan, ăp n’gor, nuĭh tơm ƀư nsrôih ƀư lôch jêh trong rse mbah rhơn nkah ndray 79 năm Cách mạng khay 8 n’hanh Quốc khánh 2/9.